జమ్మూ- కశ్మీర్‌లో తాజాగా జరిగిన మరో ఎన్‌కౌంటర్‌లో ఇద్దరులు ఉగ్రవాదులు హతమయ్యారు. అనంతనాగ్‌ జిల్లాలోని పోష్క్‌రీరి ప్రాంతంలో ఉగ్రవాదులు, భద్రతాబలగాలకు మధ్య ఎదురుకాల్పులు జరిగాయి. ఈ కాల్పుల్లో హిజ్బుల్‌ ముజాహిదీన్‌ ఉగ్రసంస్థకు చెందిన ఇద్దరు ముష్కరులు మృతి చెందారు.
పోష్క్‌రీరి ప్రాంతంలో ఉగ్రవాదుల కదలికలపై సమాచారం అందుకున్న భద్రతాబలగాలు మంగళవారం తనిఖీలు చేపట్టాయి. ఈ క్రమంలోనే ఉగ్రవాదులు కాల్పులకు తెగబడటంతో.. భద్రతాబలగాలు ఎదురుకాల్పులు జరిపాయి. ఈ ఎన్‌కౌంటర్‌లో డానిష్‌ భట్‌, బషరత్‌ నబీ అనే ఇద్దరు ఉగ్రవాదులు హతమైనట్లు అధికారులు తెలిపారు.
‘హిజ్బుల్‌ ముజాహిదీన్‌తో సంబంధం ఉన్న ఇద్దరు ఉగ్రవాదులు డానిష్‌ భట్‌ అలియాస్‌ కొకబ్‌ దూరీ, బషరత్‌ నబీ హతమయ్యారు. 2021 ఏప్రిల్‌లో ఓ సైనికుడి హత్య కేసుతోపాటు, 2021 మేలో జబ్లీపురలో ఇద్దరు పౌరుల హత్య కేసులో వీరికి ప్రమేయం ఉంది’ అని కశ్మీర్‌ జోన్‌ ఏడీజీపీ విజయ్‌కుమార్‌ వెల్లడించారు.
