మహారాష్ట్రలో ఇవాళ తెల్లవారుజామున ఘోర రోడ్డు ప్రమాదం చోటు చేసుకుంది. ఈ ప్రమాదంలో ఒకే కుటుంబానికి చెందిన తొమ్మది మంది దుర్మరణం చెందారు. ఒకరు గాయపడ్డారు. రాయగడ జిల్లా రెపోలీ ప్రాంతంలో ముంబయి-గోవా రహదారిపై గురువారం ఉదయం 4.45కు జరిగిందీ ప్రమాదం.
పోలీసుల సమాచారం ప్రకారం.. వ్యాన్లో ఉన్నవారంతా బంధువులు. అందరూ కలిసి రత్నగిరి జిల్లాలోని గుహాగర్కు వెళ్తున్నారు. ముంబయి వెళ్తున్న లారీ.. వేగంగా వచ్చి వ్యాన్ను ఢీకొట్టింది. వ్యాన్లోని ఒక బాలిక, ముగ్గురు మహిళలు, ఐదుగురు పురుషులు మరణించారు. మరో నాలుగేళ్ల బాలికకు గాయాలయ్యాయి.
సమాచారం అందిన వెంటనే పోలీసులు ఘటనా స్థలికి చేరుకున్నారు. సహాయక చర్యలు చేపట్టారు. గాయపడ్డ చిన్నారిని మన్గావ్లోని ఆస్పత్రికి తరలించారు. పోస్టుమార్టం పరీక్షల కోసం మృతదేహాలను ప్రభుత్వ ఆస్పత్రికి పంపించారు. ప్రమాదానికి కారణమేంటో తెలియాల్సి ఉందని పోలీసులు చెప్పారు.
