సినిమా ఇండస్ట్రీలో కొన్ని కాంబినేషన్లు ఎవర్ గ్రీన్. కేవలం హీరో హీరోయిన్ల కాంబోలే కాదు.. మల్టీస్టారర్ కాంబోలూ స్పెషలే. ఇక ఆనాటి హీరోలు మళ్లీ ఓసారి కలిసి తెరపై కనిపిస్తే చూడాలని ఉవ్విళ్లూరే ప్రేక్షకులు ఎందరో. అలా ప్రేక్షకులను తమ నటన.. అందంతో మైమరిపించిన ఓ కాంబో.. రజనీకాంత్.. అమితాబ్ బచ్చన్. ఈ ఎవర్ గ్రీన్ కాంబినేషన్ మరోసారి వెండితెరపై సందడి చేసేందుకు రంగం సిద్ధమవుతోంది.
రజనీకాంత్.. అమితాబ్ బచ్చన్ దాదాపు 32ఏళ్ల విరామం తర్వాత కలిసి తెర పంచుకోనున్నారు. రజనీ 170వ చిత్రంతో ఈ కాంబినేషన్ కార్యరూపంలోకి రానుంది. ఇది అమితాబ్‌కు తొలి తమిళ చిత్రం కానుంది. ఈ సినిమాని ‘జై భీమ్‌’ దర్శకుడు టి.జె.జ్ఞానవేల్‌ తెరకెక్కించనున్నారు. లైకా ప్రొడక్షన్స్‌ సంస్థ నిర్మిస్తోంది. బూటకపు ఎన్‌కౌంటర్లకు వ్యతిరేకంగా పోరాడే ఓ రిటైర్డ్‌ పోలీస్‌ ఆఫీసర్‌ కథగా ఈ చిత్రం రూపొందనున్నట్లు తెలిసింది.
ఆ పోలీస్‌ పాత్రను రజనీ పోషించనుండగా.. మరో ముఖ్య పాత్రలో అమితాబ్ నటించనున్నారని సమాచారం. రజనీ – అమితాబ్ చివరిగా 1991లో వచ్చిన ‘హమ్‌’ సినిమాలో కలిసి నటించారు.
