కర్ణాటక మాజీ ముఖ్యమంత్రి, కాంగ్రెస్ సీనియర్ నేత సిద్ధరామయ్య సహనం కోల్పోయారు. విచక్షణ కోల్పోయారు. ఒక్కసారిగా ఓ మహిళపై విరుచుకుపడ్డారు. ముఖ్యమంత్రిగా పనిచేసిన వ్యక్తి… విచక్షణారహితంగా ప్రవర్తించి ఆమె చున్నీ లాగాడు. ఆమెను కోప్పడుతూ.. మైకు లాక్కొని బలవంతంగా కూర్చోబెట్టాడు. ఈ ఘటనపై సర్వత్రా విమర్శలు వెల్లువెత్తుతున్నాయి.
వరుణ నియోజకవర్గంలో జరిగిన ఓ కార్యక్రమంలో పాల్గొన్న సిద్ధరామయ్య సహనం కోల్పోయారు. ఓ మహిళ తన సమస్యలు చెప్పుకోవడానికి ఆయన దగ్గరికి వచ్చింది. ఎమ్మెల్యే అక్కడ ఎటువంటి అభివృద్ధి కార్యక్రమాలు చేపట్టడం లేదని ఆయన ముందు వాపోయింది. దీంతో ఒక్కసారిగా కోపోద్రికుడైన సిద్ధరామయ్య.. ఆమె చేతిలోని మైకును గుంజుకొని.. ఆమె చున్నీ లాగి బలవంతంగా కూర్చోబెట్టాడు.
#WATCH Former Karnataka Chief Minister and Congress leader Siddaramaiah misbehaves with a woman at a public meeting in Mysuru. #Karnataka pic.twitter.com/MhQvUHIc3x
— ANI (@ANI) January 28, 2019
అయితే.. ఆయన కూర్చున్న టేబుల్ మీద తాను చేయి వేసినందుకే ఆయనకు కోపం వచ్చిందని.. అందుకే తన నుంచి మైకు గుంజుకున్నాడని ఆ మహిళ వెల్లడించింది. అందరి ముందూ తిట్టాడని వాపోయింది. తన కొడుకు ప్రాతినిథ్యం వహిస్తున్న వరుణ నియోజకవర్గంలో సమస్యలు కుప్పలు తెప్పలుగా ఉన్నాయని.. సమస్యలు తీర్చాలని ఓ మహిళ అభ్యర్థిస్తే.. సీఎం స్థాయి వ్యక్తి ఇలాగేనా ప్రవర్తించేది అంటూ చాలామంది ఆయన మీద ఆగ్రహం వ్యక్తం చేస్తున్నారు. దానికి సంబంధించిన వీడియో కూడా ప్రస్తుతం సోషల్ మీడియాలో వైరల్ కావడంతో నెటిజన్లు కూడా సిద్ధరామయ్యపై ఫైర్ అవుతున్నారు.
