ఇండియా పాకిస్తాన్ మధ్య ఉద్రిక్తతలు పెరుగుతున్నాయి. ఇది ప్రపంచం దృష్టిని ఆకర్షిస్తోంది.ఈ నేపథ్యంలో అసలు ఇండియా– పాక్ మధ్య యుద్ధం అంటూ వస్తే ఎలా ఉంటుంది. ఒకవేళ అణు యుద్ధం జరిగితే ఏమవుతుంది.. అనే అంశంపై అమెరికాలోని కొలరాడో బౌల్డర్‌ అండ్ రట్జర్స్‌ యూనివర్సిటీకి చెందిన కొందరు పరిశోధకులు పరిశోధన చేశారు. వారు చెప్పింది వింటే ఒళ్లు గగుర్పొడుస్తుంది.
ఇండియా–పాక్ అణుయుద్ధం గురించి వారు ఏంచెబుతున్నారంటే.. భారత్‌, పాకిస్థాన్‌ మధ్య అణుయుద్ధమంటూ జరిగితే.. వారం రోజుల్లోపే 5 కోట్ల నుంచి 12.5 కోట్ల మంది దాకా ప్రాణాలు కోల్పోతారట. ఎందుకంటే.. రెండు దేశాల వద్దా చెరో 150 దాకా అణు వార్‌హెడ్లు ఉన్నాయి. 2025 నాటికి ఆ సంఖ్య 200-250కి చేరొచ్చు. అప్పుడు గనక యుద్ధం జరిగితే మరణాల రేటు రెట్టింపు అవుతుందట. కేవలం ప్రాణ నష్టమే కాదు.. అణుధార్మిక ప్రభావానికి గురయి సుదీర్ఘకాలం అనారోగ్యంతో బాధపడి చనిపోయేవారి సంఖ్య కూడా ఎక్కువగా ఉంటుందట.
అంతే కాదు.. ప్రపంచం మీద ఈ యుద్ధ ప్రభావం చాలా ఉంటుందట. ప్రకృతిపై ఆ యుద్ధం వేసే ముద్ర బీభత్సమట. అసలు ఇలాంటి యుద్ధాన్ని ఇంతవరకు మానవజాతి చవిచూసి ఉండబోదంటున్నారు. అణుబాంబులు పేలడం వల్ల వాటి నుంచి వెలువడే 16 నుంచి 36 మిలియన్‌ టన్నుల నల్లటి, సూక్ష్మమైన కార్బన్‌ అణువులు వాతావరణంలో పై భాగానికి చేరి వారం రోజుల్లో విశ్వమంతా వ్యాపిస్తుందట. ఆ పరిస్థితి రాకూడదని కోరుకుందాం.
