ప్రజా యుద్ధనౌక గద్దర్ మరణం పట్ల తీవ్ర దిగ్భ్రాంతి వ్యక్తం చేశారు ఆంధ్రప్రదేశ్ మాజీమంత్రి, గుడివాడ ఎమ్మెల్యే కొడాలి నాని. గద్దర్ మరణం విప్లవ కారులకు , ఉద్యమకారులకు, మాకు తీరని లోటని అన్నారు. గద్దర్ తో తనకు వ్యక్తిగతంగా మంచి సంబంధాలున్నాయన్నారు. ఎమ్మెల్యే వంశీతో కలిసి చాలాసార్లు గద్దర్ ను కలిశానని తెలిపారు కొడాలి నాని.
2009లో గద్దర్ చేతుల మీదుగా ఉంగుటూరులో బీఆర్ అంబేద్కర్ విగ్రహాన్ని ఆవిష్కరింపజేశామన్నారు. గద్దర్ తన పాటలతో ఉమ్మడి ఆంధ్రప్రదేశ్ లో అట్టడుగు వర్గాలను, యువతను కదిలించారని కొనియాడారు. గద్దర్ మృతికి ప్రగాఢ సంతాపం తెలియజేస్తున్నానన్నారు కొడాలి నాని. వారి కుటుంబసభ్యులకు తన ప్రగాఢ సానుభూతిని తెలియజేశారు.
