ఏపీ ప్రజలకు శుభవార్త.. 23 రకాల పనులతో వర్షాకాలంలోనూ ఉపాధి పనులు నిర్వహించాలని జగన్‌ సర్కార్‌ ఆలోచన చేస్తోంది. వర్షాకాలంలోనూ గ్రామాల్లో ఉపాధి పనులు కల్పించేందుకు ఆంధ్ర ప్రదేశ్‌ రాష్ట్ర ప్రభుత్వం కసరత్తు చేస్తోంది.
మురుగు/వరద నీరు మళ్లింపు కాలువల తవ్వకం, బ్రిడ్జిలు, పైపు కల్వర్టుల పూడికతీత, రోడ్లు, నీటిపారుదల కాలువ వెంబడి మొక్కలు నాటడం, కొండలపై నుంచి పారే వర్షపు నీరు నిల్వకు వీలుగా ట్రెంచ్ ల నిర్మాణం వంటి 23 రకాల పనులను గ్రామీణ అభివృద్ధి శాఖ గుర్తించింది. ఇప్పటికే అనుమతి ఉన్న పనులతో పాటు ఈ పనులను కూలీలకు అప్పగిస్తారు.
కాగా, జాతీయ ఉపాధి హామీ పథకం పనులకు హాజరయ్యే కూలీల పెండింగ్ వేతనాలకు సంబంధించి అధికారులు స్పందించారు. 5 వారాలుగా చెల్లింపులు నిలిచిపోగా… త్వరలోనే ఉపాధి కూలీల బ్యాంకు ఖాతాల్లో పెండింగ్ వేతనాలు జమ చేస్తామని గ్రామీణ అభివృద్ధి శాఖ అధికారి తెలిపారు. కొన్ని జిల్లాల్లో ఇప్పటికే చెల్లింపులు ప్రారంభమయ్యాయని… త్వరలోనే మిగతా జిల్లాల్లోనూ జమ అవుతాయన్నారు.
