పంజాబ్లోని బఠిండా మిలిటరీ స్టేషన్లో ఇటీవల కాల్పుల ఘటన చోటుచేసుకున్న విషయం తెలిసిందే. ఈ ఘటనలో నలుగురు ఆర్మీ జవాన్లు మృతి చెందడం దేశవ్యాప్తంగా కలకలం సృష్టించింది. ఈ ఘటనపై దర్యాప్తు చేపట్టిన పంజాబ్ పోలీసులు ఇవాళ ఉదయం నిందితుడిని అరెస్టు చేశారు.
ఈ కేసులో మొదట తమను తప్పుదోవ పట్టించిన సైనికుడై కాల్పులకు పాడ్డాడని బఠిండా సీనియర్‌ సూపరిండెంట్‌ ఆఫ్‌ పోలీసు గుల్నీత్‌ సింగ్‌ ఖురానా వెల్లడించారు. ఈ మేరకు సైనిక స్థావరంలో గన్నర్‌గా విధులు నిర్వహిస్తున్న మోహన్‌ దేశాయ్‌ అనే సైనికుడిని ఈ కేసులో అరెస్టు చేసినట్లు తెలిపారు. ‘‘వ్యక్తిగత కారణాలతోనే నిందితుడు ఈ కాల్పులకు పాల్పడ్డాడని.. మృతి చెందిన జవాన్లతో ఇతడికి(దేశాయ్‌ మోహన్‌) వ్యక్తిగత వైరం ఉందని ఎస్‌ఎస్పీ పేర్కొన్నారు.
ఏప్రిల్‌ 12వ తేదీ తెల్లవారుజామున బఠిండా సైనిక స్థావరంలో చోటుచేసుకున్న కాల్పుల ఘటనలో నలుగురు జవాన్లు ప్రాణాలు కోల్పోయిన విషయం తెలిసిందే. ఈ ఘటనపై పంజాబ్ పోలీసులు కేసు నమోదు చేసి దర్యాప్తు చేపట్టారు. ఈ ఘటనలో సాక్షిగా ఉన్న మేజర్‌ అషుతోశ్‌ శుక్లా వాంగ్మూలం ఆధారంగా పంజాబ్ పోలీసులు ఇద్దరు వ్యక్తులపై ఎఫ్‌ఐఆర్‌ నమోదు చేశారు. ఆదివారం నలుగురు అనుమానిత జవాన్లను అదుపులోకి తీసుకుని విచారించగా అందులో.. మోహన్‌ దేశాయ్‌ నేరాన్ని అంగీకరించినట్లు పోలీసు వర్గాలు తెలిపాయి.
