త్రిగర్తల సామ్రాజ్యాధినేత బింబిసారుడిగా.. నందమూరి కల్యాణ్రామ్ నటించిన యాక్షన్ ఎంటర్‌టైనర్‌ ‘బింబిసార’. సోషియో ఫాంటసీ కథాంశంతో రూపుదిద్దుకున్న ఈ చిత్రం కల్యాణ్ కెరీర్లోనే భారీ స్థాయిలో నిర్మించబడింది. 500 ఏళ్ల క్రితం జరిగిన నిజమైన కథ ఆధారంగా టైం ట్రావెల్ పాయింట్తో.. ఎన్టీఆర్ ఆర్ట్స్ బ్యానర్పై కల్యాణ్ నిర్మించారు. వశిష్ట దశకత్వం వహించారు. కీరవాణి స్వరాలు సమకూర్చారు. కేథరిన్, సంయుక్త మేనన్ హీరోయిన్లుగా నటించారు. ఇప్పటికే విడుదలై టీజర్, ట్రైలర్తో ప్రేక్షకులను ఆకట్టుకున్న ఈ సినిమా.. భారీ అంచనాలతో నేడు(శుక్రవారం) థియేటర్లలో భారీ స్థాయిలో విడుదలైంది. మరి ఈ మూవీ ఏ మేరకు ఆకట్టుకుందో చూద్దాం.
సాధారణంగా తెలుగు ప్రేక్షకులకు సోషియో ఫాంటసీ సినిమాలు కొత్తేమి కాదు. సీనియర్ ఎన్టీఆర్ కాలం నుంచి బాహుబలి వరకు , మనం చాలా సోషియో-ఫాంటసీ చిత్రాలను చూశాం. అయితే బింబిసారాలో కొత్తగా అనిపించేది టైమ్ ట్రావెల్ కాన్సెప్ట్. ఇది మాములు టైమ్ ట్రావెల్లా కాకుండా, ఈ కథ సమాంతర ప్రపంచంలో నడుస్తుంది. ఇక్కడ రెండు టైమ్‌లైన్‌లతో సంబంధం లేదు కానీ దర్శకుడు దానిని ఎలా కనెక్ట్ చేశాడు అనేదే ప్రత్యేకం.
ఈ చిత్రం సాలిడ్ యాక్షన్ బ్లాక్‌తో బాగా మొదలైంది. బింబిసార ప్రపంచాన్ని పరిచయం చేస్తుంది. ఆ తర్వాత బింబిసార క్రూరత్వాన్ని చూపించడానికి దాదాపు 30 నిమిషాలు తీసుకున్నారు దర్శకుడు. క్రీస్తుపూర్వం 500 సంవత్సరాల క్రితం త్రిగర్తల సామ్రాజ్య అధినేత బిందుసారుడి పాత్రలో కల్యాణ్ రామ్ కనిపించారు. ఆయన ద్విపాత్రాభినయం బాగా చేశారు. డైలాగ్ డెలీవరీ కూడా బాగుంది. అయితే విశ్వానందన్ వర్మ (ప్రకాష్ రాజ్) పాత్ర ప్రత్యేకంగా నిలుస్తుంది. సినిమా కథ మొత్తం బింబిసారుడి కాలం నుండి కలియుగంలోకి వచ్చి సంపాదించిన నిధిని ఎలా కాపాడుకుంటాడు అనేదాని చుట్టు తిరుగుతుంది.
అయితే ఫస్టాప్ కాస్త స్లోగా అనిపించినా గ్రాఫిక్స్ మాత్రం అద్భుతంగా ఉన్నాయి. ప్రేక్షకులకు తెగ నచ్చేసింది. ఇక ఇంటర్వెల్ అయితే అదిరిపోయింది. సెకండాఫ్ కూడా ఆకట్టుకునే విధంగా ఉంది. ముఖ్యంగా సినిమాలో గ్రాఫిక్స్ ప్రేక్షకులను బింబిసార ప్రపంచంలోకి తీసుకెళ్తున్నాయి. ముఖ్యంగా కీరవాణి అందించిన సంగీతం ఈ సినిమాకు ప్లస్ అయ్యింది. సాంకేతికంగా చోటా కె నాయుడు విజువల్స్ బాగున్నాయి. నూతన దర్శకుడు అయినప్పటికీ వశిష్ట తన టాలెంట్ను నిరూపించుకున్నాడు. ఈ సినిమా నందమూరి అభిమానులకు విజువల్ ఫీస్ట్ అనే చెప్పాలి.
చివరగా, బింబిసార అనేది అన్ని వర్గాల ప్రేక్షకులు చూడగలిగే మంచి సోషియో-ఫాంటసీ చిత్రం.
రేటింగ్: 3.0/5
