విశాఖపట్నం: తెలుగు ప్ర‌జ‌ల‌ను భ‌య‌పెడుతున్న చెడ్డీ గ్యాంగ్ విశాఖ నగరంలో సంచ‌రిస్తున్న‌ట్లు స‌మాచారం తెలుస్తోంది. దీంతో విశాఖ నగరంలో చెడ్డీ గ్యాంగ్ కదలికలపై పోలీసులు అప్రమత్తమయ్యారు. నగర శివార్లలోని పోతిన మల్లయ్యపాలెంలోని పనోరమా హిల్స్‌లో 66 నెంబర్ విల్లా వద్ద ఈ గ్యాంగ్ సంచరించినట్లు అక్కడి సీసీ కెమెరా దృశ్యాల అధారంగా పోలీసులు నిర్ధారించారు. దీంతో వీరి ఆచూకీ కోసం విస్తృత గాలింపు చేపట్టారు. ఈ విల్లా యజమాని లక్ష్మీనారాయణ హైదరాబాద్ నివాసి. అప్పుడప్పుడు విశాఖ వచ్చి వెళ్తుంటాడు. ప్రస్తుతం ఈ విల్లాలో చోరీ జరగనప్పటికీ.. చెడ్డీ గ్యాంగ్ గతంలో నగర శివార్లలో దొంగతనాలకు పాల్పడిన ఘటనలున్నాయి. వీరిని పట్టుకుంటే నగరంలో జరిగిన చోరీలకు సంబంధించి ఆధారాలు దొరికే అవకాశం ఉంటుందని పోలీసు వర్గాలు చెబుతున్నాయి.
