ఉక్రెయిన్పై రష్యా దాడులపై ఆ దేశం ప్రతీకార దాడులు షురూ చేసింది. తాజాగా రష్యాపై ఉక్రెయిన్ భారీస్థాయిలో ఎదురుదాడి ప్రారంభించింది. డొనెట్స్క్‌, బఖ్‌ముత్‌ సహా పలు ప్రాంతాల్లో తమ దళాలు దూసుకుపోతున్నాయని ఆ దేశ అధ్యక్షుడు జెలెన్స్కీ తెలిపారు. ముఖ్యంగా బఖ్‌ముత్‌లో మాస్కో దళాలను వెనక్కి నెడుతున్నట్లు ప్రకటించారు. ఈ నగరాన్ని పూర్తిగా కైవసం చేసుకున్నామని గత వారం రష్యా ప్రకటించిన సంగతి తెలిసిందే. ఎదురుదాడిని ఉక్రెయిన్ అధ్యక్షుడు జెలెన్స్కీ ధ్రువీకరించారు.
‘‘ఎదురుదాడులు, రక్షణాత్మక చర్యలు ప్రస్తుతం జరుగుతున్నాయి. అవి ఏ దశలో ఉన్నాయనే విషయంపై మాట్లాడను. అన్ని దిశల్లో ఉన్న మా సైనిక కమాండర్లతో నేను ప్రతి రోజు మాట్లాడుతున్నాను’’ అని తెలిపారు.
మరోవైపు ఉక్రెయిన్ ఎదురుదాడి విఫలమైందని రష్యా అధ్యక్షుడు వ్లాదిమిర్‌ పుతిన్‌ పేర్కొన్నారు. కీవ్‌ దళాలను నిలువరిస్తున్నామని, అవి ముందుకు కదలడం లేదని అన్నారు.
