నల్గొండ జిల్లా చండూరులో రిటర్నింగ్ అధికారికి నామినేషన్ పత్రాలను సమర్పించారు కోమటిరెడ్డి రాజగోపాల్ రెడ్డి. నామినేషన్ కార్యక్రమానికి తరుణ్ చుగ్, సునీల్ బన్సల్, సహ ప్రబారి అరవింద్ మీనన్, కిషన్ రెడ్డి, బండి సంజయ్ హాజరయ్యారు. ఈ సందర్భంగా రాజగోపాల్ రెడ్డి మాట్లాడుతూ.. తెలంగాణ రాష్ట్ర భవిష్యత్తు కోసం, కుటుంబ పాలన అంతం కోసమే రాజీనామా చేశానని అన్నారు.
మునుగోడు ప్రజలు తనని ఆశీర్వదించాలని కోరారు. తాను ఎలాంటి ఆర్థిక లబ్ది పొందలేదని.. పొందినట్లు నిరూపిస్తే ఏ శిక్ష కైనా సిద్ధమన్నారు. భారతీయ జనతా పార్టీ ద్వారా తనకు ఎలాంటి ఆర్థిక లబ్ధి చేకూరాలేదన్నారు. దీనిపై తాను ఏ గుడిలోనైనా ప్రమాణం చేయడానికి సిద్ధంగా ఉన్నానని స్పష్టం చేశారు. మోడీ, అమిత్ షా ఆధ్వర్యంలో దేశం అభివృద్ధి పదంలో కొనసాగుతుందన్నారు రాజగోపాల్ రెడ్డి. తెలంగాణ రాష్ట్రంలో అభివృద్ధి కోసం బిజెపిని మునుగోడులో గెలిపించాలని కోరారు.
