అంతర్జాతీయ టీ20 క్రికెట్ టోర్న‌మెంట్ల‌లో ప‌సికూన దేశాలు రికార్డుల మీద రికార్డులు బ్రేక్ చేస్తున్నాయి. ఇటీవ‌ల ఐసీసీ చాలా చిన్న దేశాల‌కు టీ20 క్రికెట్ మ్యాచ్‌లు ఆడేందుకు అనుమ‌తి ఇచ్చింది. ఈ నేప‌థ్యంలోనే చాలా దేశాలు టీ20 ఆడుతున్నాయి. ఈ ప‌రంప‌ర‌లోనే సరికొత్త రికార్డులు క్రియేట్ చేస్తున్నాయి. ఈ క్ర‌మంలోనే అంతర్జాతీ టీ20 చరిత్రలో సరికొత్త రికార్డు నమోదైంది.
సింగ‌పూర్‌లో జ‌రుగుతోన్న ముక్కోణపు సిరీస్‌లో భాగంగా సింగపూర్‌తో జరిగిన మ్యాచ్‌లో నేపాల్ కెప్టెన్ పరాస్‌ ఖడ్కా శతకంతో చెలరేగాడు. పరాస్‌ 52 బంతుల్లో 7 ఫోర్లు, 9 సిక్సర్లతో అజేయంగా 106 పరుగులు చేశాడు. ఈ క్ర‌మంలోనే సింగపూర్ విధించిన 152 ప‌రుగుల ల‌క్ష్యాన్ని నేపాల్ కేవ‌లం 16 ఓవ‌ర్ల‌లోనే కేవ‌లం ఒక్క వికెట్ మాత్ర‌మే కోల్పోయి చేధించింది.
ఈ క్ర‌మంలోనే ఇంట‌ర్నేష‌న‌ల్ క్రికెట్లో ఛేజింగ్‌లో తొలి సెంచరీ చేసిన కెప్టెన్ రికార్డుతో పాటు నేపాల్ తరఫున అంతర్జాతీయ టీ20ల్లో తొలి సెంచరీ సాధించిన బ్యాట్స్‌మన్‌గా రికార్డు సాధించాడు. ఇక ఈ క్ర‌మంలోనే మూడో రికార్డు సైతం సాధించాడు. 49 బంతుల్లోనే సెంచరీ సాధించి వేగవంతంగా ఈ ఫీట్‌ సాధించిన నాలుగో ఆసియా కెప్టెన్‌గా నిలిచాడు.
ఇక ఈ మ్యాచ్‌లో సింగపూర్ ముందు బ్యాటింగ్ చేసి 151 ప‌రుగుల చేసింది. సింగపూర్ కెప్టెన్ టిమ్‌ డేవిడ్‌(64 నాటౌట్‌) రాణించగా, సురేంద్రన్‌ చంద్రమోహన్‌(35) ఫర్వాలేదనిపించాడు. ఏదేమైనా టీ20 క్రికెట్‌తో ప్ర‌పంచ‌వ్యాప్తంగా క్రికెట్‌కు రోజురోజుకు ఆద‌ర‌ణ మ‌రింత‌గా పెరుగుతోంది.
