తెలంగాణలో మే 25న ఎంసెట్ ఫలితాలు వెల్లడించిన సంగతి తెలిసిందే. జూన్ 26 నుంచి కౌన్సిలింగ్ స్లాట్ బుకింగ్ ప్రక్రియ జరుగుతోంది. జులై 12 నుంచి సీట్ల కేటాయింపు చేపట్టనున్నారు. ఈ నేపథ్యంలో తెలంగాణ విద్యాశాఖ రాష్ట్రంలో ఇంజినీరింగ్ సీట్లు ఖరారు చేసింది. 137 ప్రైవేటు కాలేజీల్లో 80,091 ఇంజినీరింగ్ సీట్లు, 16 యూనివర్సిటీ ఇంజినీరింగ్ కాలేజీల్లో 4,713 సీట్లు, 2 ప్రైవేటు విశ్వవిద్యాలయాల్లో 1,302 ఇంజినీరింగ్ సీట్లు అందుబాటులో ఉండనున్నాయి. ఈ ఏడాది కన్వీనర్ కోటా కింద 62,079 సీట్లు కేటాయించారు.
దీనికి తోడు నేడు సీట్ల సంఖ్యను విద్యాశాఖ ప్రకటించింది. రేపటి నుంచి జులై 8 వరకు వెబ్ ఆప్షన్లు నమోదు చేసుకోవడానికి అవకాశం కల్పించింది. ఈ వెబ్ ఆప్షన్లు పూర్తి అయిన తర్వాత జులై 12న మొదటి విడత ఇంజినీరింగ్ సీట్ల భర్తీ ఉంటుందని.. సీట్లు పొందిన అభ్యర్థులు జులై 12 నుంచి 19 వరకు ఆన్లైన్లో సెల్ఫ్ రిపోర్టింగ్ చేయాల్సి ఉంటుందని రాష్ట్ర విద్యాశాఖ ఆదేశించింది.
అలాగే జులై 21 నుంచి 24 వరకు రెండో విడత ఇంజినీరింగ్ ప్రవేశాలకు కౌన్సిలింగ్ ఉంటుందని తెలిపింది. జులై 28న రెండో విడత ఇంజినీరింగ్ సీట్లు కేటాయించనున్నారు. ఆగస్టు 2న తుది విడత ఇంజినీరింగ్ ప్రవేశాలు ప్రక్రియ ఉంటుందని.. అప్పటి నుంచి ఆగస్టు 4 వరకు తుది విడత వెబ్ ఆప్షన్ల నమోదు అవకాశం కల్పించనున్నారు. ఆగస్టు 7న తుది విడత ఇంజినీరింగ్ సీట్లు కేటాయించి.. ఆగస్టు 7 నుంచి 9 వరకు కాలేజీల్లో చేరేందుకు గడువు ఇవ్వనున్నారు. మరలా ఆగస్టు 8న స్పాట్ అడ్మిషన్ల మార్గదర్శకాలు విడుదల కానున్నాయని రాష్ట్ర విద్యాశాఖ స్పష్టం చేసింది.
