యువత చదువుతోపాటు దేశానికి స్వాతంత్య్రం తీసుకొచ్చిన యోధుల చరిత్రనూ తెలుసుకోవాలని తెలంగాణ గవర్నర్ తమిళిసై సౌందర రాజన్ సూచించారు. ఆజాదీ కా అమృత్‌ మహోత్సవ్‌ కార్యక్రమంలో భాగంగా ఆమె సోమవారం సాలార్ జంగ్ మ్యూజియాన్ని సందర్శించారు. ఈ సందర్భంగా కేంద్ర సమాచార మంత్రిత్వ శాఖ ఏర్పాటు చేసిన తెలుగు స్వాతంత్య్ర సమరయోధుల ఛాయచిత్ర ప్రదర్శనను లాంఛనంగా ప్రారంభించారు.
సుమారు 38 మంది స్వాతంత్య్ర పోరాటయోధుల చరిత్రను ఈ ప్రదర్శనలో సంక్షిప్త వివరాలతో ఏర్పాటు చేసిన ఫొటోలను పరిశీలించిన గవర్నర్.. జాతీయ జెండా రూపకల్పనలో కృషి చేసిన సిస్టర్ నివేదిత, డాక్టర్ అనిబిసెంట్, పింగళి వెంకయ్య సేవలను కొనియాడారు. సాలార్ జంగ్ మ్యూజియంను సందర్శించే వారిలో ఈ ప్రదర్శన దేశభక్తిని పెంపొందిస్తుందన్నారు.
గతంలో ఏడాదిలో ఒక్కరోజే జెండా పండుగ వచ్చేదని, ఇప్పుడు ఏడాదంతా స్వాతంత్ర్య వేడుకలు జరుపుకునే అదృష్టం కలిగిందంటూ తమిళి సై సంతోషం వ్యక్తం చేశారు. ఈ ప్రదర్శనలో భారత వ్యోమగామి రాకేశ్ శర్మ, స్టార్ షెట్లర్ పీవీ సింధు ఛాయాచిత్రాలు కూడా ప్రదర్శించడం విశేషం.
