నిన్న కాంగ్రెస్‌ అధిష్ఠానానికి రాజీనామా లేఖను పంపిన కోమటిరెడ్డి రాజగోపాల్‌రెడ్డి.. భవిష్యత్‌ కార్యాచరణకు వేగంగా అడుగులు వేస్తున్నారు. రెండేళ్లకు పైగా కాంగ్రెస్‌ వీడే విషయంలో సందిగ్ధంలో ఉన్న ఆయన.. సొంతపార్టీ తీరుపై విమర్శలు గుప్పిస్తూ….. బీజేపీని పొగడ్తలతో ముంచెత్తుతూ వచ్చారు.
రెండ్రోజుల క్రితం కాంగ్రెస్‌ను వీడుతున్నట్లు ప్రకటించిన రాజగోపాల్‌…. ఎమ్మెల్యే పదవికి సైతం రాజీనామా చేస్తానని ప్రకటించారు. దీంతో రాష్ట్రంలో ఒక్కసారిగా రాజకీయ వేడి రగులుకుంది. పార్టీని వీడుతున్నట్లు ప్రకటించిన వెంటనే కాంగ్రెస్‌ నేతల విమర్శలపై ఎదురుదాడికి దిగిన రాజగోపాల్‌రెడ్డి నిన్న తన రాజీనామా లేఖను సోనియాగాంధీకి ప్రకటించారు. అదే విధంగా తన శాసనసభ సభ్యత్వానికి రాజీనామా చేస్తూ ఈ నెల 8న సభాపతి పోచారానికి లేఖను అందజేసే అవకాశముంది.
హస్తం పార్టీని వీడటంతో.. భాజపాలో చేరటం లాంఛనమే అయిన నేపథ్యంలో.. ఇవాళ ఆయన దిల్లీకి వెళ్లారు. బీజేపీ జాతీయ నేతలతో సమావేశమై.. పార్టీలో చేరిక తేదీతో పాటు ఉపఎన్నికకు సంబంధించిన అంశాలపై చర్చించే అవకాశముందని రాజకీయ వర్గాలు చెబుతున్నాయి.
