యువ‌త ఉద్యోగ- ఉపాధి అవ‌కాశాల భ‌ర్తీపై ప్ర‌ధాని మోడీకి టీఆర్ఎస్ వర్కింగ్ ప్రెసిడెంట్ కేటీఆర్ బహిరంగ లేఖ రాశారు. కేంద్ర ప్రభుత్వ పరిధిలో ఉన్న 16 లక్షల ప్రభుత్వ ఉద్యోగాలను భర్తీ చేయాలని లేఖలో డిమాండ్ చేశారు. ఏటా రెండు కోట్ల ఉద్యోగాలన్న మోడీ ప్రైవేట్ ఉద్యోగాలు ఎక్కడ పోయాయని ప్రశ్నించిన కేటీఆర్.. ఒక రాష్ట్రంగా తెలంగాణ ఇప్పటికే లక్ష 32 వేల ప్రభుత్వ ఉద్యోగాలను భర్తీ చేసిందని పేర్కొన్నారు.
మరో లక్ష ప్రభుత్వ ఉద్యోగాలను భర్తీ చేయబోతున్నదని..ప్రైవేటు రంగంలో 16 లక్షల ఉపాధి, ఉద్యోగ అవకాశాలను కల్పించామన్నారు. కానీ కేంద్ర ప్రభుత్వం ప్రభుత్వ ఉద్యోగాలను భర్తీ చేయకపోగా, ఉన్న ఉపాధి ఉద్యోగ అవకాశాలపై దెబ్బ కొడుతుందని.. ప్రభుత్వ రంగ సంస్థలను అమ్మడం ద్వారా శాశ్వతంగా లక్షల ప్రభుత్వ ఉద్యోగాలు కోల్పోయే ప్రమాదం ఏర్పడిందని వెల్లడించారు.
దేశ యువతకు ఉద్యోగాలు కల్పించడంలో ప్రధానమంత్రి విఫలమయ్యారు.. తెలంగాణ యువతకు ఉద్యోగాలు కల్పించే ఐటిఐఆర్ ప్రాజెక్టు రద్దు ద్వారా పెద్ద దెబ్బ కొట్టారన్నారు. ప్రధానమంత్రి మోడీ కి ఉద్యోగాల భర్తీ పైన పలు ప్రశ్నలు సంధించిన కేటీఆర్.. కేంద్ర ప్రభుత్వ ఉద్యోగాల భర్తీ కోసం యువతతో కలిసి టీఆర్ఎస్ ఆందోళన చేస్తామని హెచ్చరించారు.
