తెలంగాణ ఏర్పడిన తరువాత ముఖ్యమంత్రి శ్రీ. కె.చంద్రశేఖరరావు ప్రతిష్టాత్మకంగా తీసుకొని మిషన్ భగీరథను చేపట్టారు. అంతర్జాతీయ పోటీ పద్ధతిలో నిర్వహించిన టెండర్లలో పలు ప్యాకేజీలను ఏంఈఐఎల్‌ దక్కించుకుంది. ప్రస్తుతం ఉన్న 31 జిల్లాల్లో (గతంలోని తొమ్మిది గ్రామీణ జిల్లాల్లో) రక్షిత తాగునీరు అందించే ఉద్దేశ్యంతో చేపట్టిన మిషన్ భగీరథ పనులు దాదాపుగా పూర్త‌య్యాయి. 10శాతం మిగిలిపోయిన ప‌నుల‌ను పూర్తి చేస్తున్నారు. ఇదిలా ఉండగా ఇంటింటికీ నల్లా కనెక్షన్ల ద్వారా సురక్షిత మంచినీటిని సరఫరా చేయడంలో దేశంలోనే నంబర్‌వన్‌గా తెలంగాణ రాష్ట్రం నిలిచింది. ఈ విషయాన్ని కేంద్ర జలవనరులశాఖ స్వయంగా తెలియజేసింది.
ఇప్పటివరకు తెలంగాణ రాష్ట్రంలో 98.29 శాతం ఇళ్లకు నల్లా కనెక్షన్స్ ద్వారా తాగునీరు అందిస్తున్నట్టు తెలిపింది. తెలంగాణకు దరిదాపుల్లో ఇతర రాష్ట్రాలు లేని విషయాన్ని వెల్లడించింది. తెలంగాణ తర్వాత గోవాలో 89.05 శాతం ఇళ్లకు నల్లా కనెక్షన్లు ఉన్నాయి. ఈ రెండు రాష్ట్రాల తర్వాత ఎక్కువ నల్లా కనెక్షన్లు ఇచ్చిన రాష్ట్రాల్లో పుదుచ్చేరి, హరియాణా, గుజరాత్ టాప్ 5 లిస్టులో ఉన్నాయి. ఇక 34.62 శాతం నల్లా కనెక్షన్లతో ఆంధ్రప్రదేశ్‌ 13వ స్థానంలో ఉండగా.. మేఘాలయ, పశ్చిమ బెంగాల్ రాష్ట్రాల్లో చివరి స్థానాల్లో నిలిచాయి.స్వయంగా కేంద్ర మంత్రిత్వశాఖ ఈ మేరకు ప్రకటించడంతో ఈ విషయ మీద ఐటీ,మున్సిపల్‌ శాఖ మంత్రి కేటీఆర్‌ హర్షం వ్యక్తం చేశారు. ముఖ్యమంత్రి కేసీఆర్ దార్శనికతకు ఈ పథకం నిద‌ర్శ‌న‌మ‌ని విప‌క్షాలు సైతం కొనియాడుతున్నాయి.
