మాస్టర్ బ్లాస్టర్ సచిన్ టెండూల్కర్ కుమారుడు అర్జున్ టెండూల్కర్ తొలి రంజీ మ్యాచ్‌లోనే సెంచరీని నమోదు చేసుకున్నాడు. గోవా రంజీ టీమ్ తరపున దేశవాళీ బరిలో దిగిన అర్జున్ టెండూల్కర్ రాజస్థాన్ జట్టుతో గ్రూప్-సి మ్యాచ్‌లో అందరినీ ఆకట్టుకున్నాడు. ఈ మ్యాచ్ లో ఏడోస్థానంలో బ్యాటింగ్ కు వచ్చిన అర్జున్ 207 బంతుల్లో 120 పరుగులు చేశాడు. అతడి స్కోరులో 16 ఫోర్లు, 2 సిక్సులు ఉన్నాయి. కాగా, సచిన్ టెండూల్కర్ తొలి రంజీ మ్యాచ్ లోనే సెంచరీతో ఔరా అనిపించాడు. ఇప్పుడు అర్జున్ టెండూల్కర్ కూడా తండ్రి బాటలోనే నడిచి మొదటి మ్యాచ్ తోనే శతక వీరుల జాబితాలో చేరాడు. అయితే సచిన్ ఈ ఘనత 15 ఏళ్ల వయసులో సాధించగా, అర్జున్ 23 ఏళ్ల వయసులో సాధించాడు.
ఆశ్చర్యకరమైన విషయం ఏమిటంటే… అర్జున్ టెండూల్కర్ ప్రధానంగా లెఫ్టార్మ్ పేస్ బౌలర్… బౌలర్ గానే అతడు గోవా జట్టుకు ఎంపికయ్యాడు. అయితే బ్యాటింగ్ లో తన ప్రతిభ నిరూపించుకుని టీమిండియా దిశగా తొలి అడుగును ఘనంగా వేశాడు. ఈ మ్యాచ్ విషయానికొస్తే రంజీ ట్రోఫీ ఎలైట్ విభాగం గ్రూప్-సిలో భాగంగా గోవా, రాజస్థాన్ జట్లు పోర్వోరిమ్ లో తలపడుతున్నాయి. టాస్ గెలిచిన రాజస్థాన్ బౌలింగ్ ఎంచుకోగా, గోవా బ్యాటింగ్ కు దిగింది. తొలి రోజు ఆటలో 4 పరుగులతో క్రీజులో ఉన్న అర్జున్ టెండూల్కర్ రెండోరోజు ఆటలో బ్యాట్ ఝుళిపించాడు.
