ప్రస్తుత ప్రపంచంలో స్వార్థం అనేది విపరీతంగాపెరిగిపోయింది. ప్రతీ ఒక్కరూ తమకోసమే ఆలోచిస్తున్నారు. అవతలి వారి గురించి ఆలోచించే వాళ్ళు తక్కువైపోయారు. నిజానికి అలా ఆలోచించే వారిని చేతకాని వారిగా పరిగణిస్తున్నారు. కానీ, జీవితంలో ఒక్కసారైనా నిస్వార్థంగా బ్రతకాలి. ఎందుకంటే లైఫ్ ఎప్పుడు, ఏ విధంగా మలుపు తిరుగుతుందో చెప్పలేం. ఈ రోజు బాగున్నది రేపటి వరకు నాశనం అయిపోవచ్చు. మీ స్వార్థమే మిమ్మల్ని అనుకోని మలుపులకు తీసుకెళ్ళవచ్చు. ఐతే ప్రస్తుతం నిస్వార్థమైన ప్రేమ గురించి ఒక కథ తెలుసుకుందాం.
ఒక కుటుంబంలో ఆరేళ్ళ చిన్న పాపకి తీవ్రమైన అనారోగ్యం వచ్చింది. రక్తానికి సంబంధించిన వ్యాధి కారణంగా ఆమెకు రక్తం ఎక్కించాల్సి వచ్చింది. ఐతే ఆమె బ్లడ్ గ్రూప్ ఎక్కువ మందికి ఉండదు. అందువల్ల రక్తం దొరకడం కష్టమైపోయింది. చివరికి ఆ పాప అన్నయ్య బ్లడ్ గ్రూప్, ఆ పాప గ్రూప్ తో మ్యాచ్ అయ్యింది. దాంతో డాక్టర్లు, ఇతర కుటుంబ సభ్యులందరూ, ఆ పాప కండీషన్ ఎలాంటిదో, ఆమెకు రక్తం ఎందుకు అవసరమో ఆ అన్నయ్యకి క్లియర్ గా చెప్పారు. అంతా విన్న ఆ అబ్బాయి, ఒకరోజు టైమ్ తీసుకుని బాగా ఆలోచించి, సరే అని ఒప్పుకున్నాడు.
తెల్లారి ఆ పాప బెడ్ పక్కనే మరో బెడ్ వేసి ఆ అబ్బాయి రక్తాన్ని పాపకు ఎక్కించారు. సక్సెస్ ఫుల్ గా కంప్లీట్ అయింది. డాక్టర్లు చాలా సంతోషించారు. కుటుంబ సభ్యులు కూడా ఆనందంగా ఉన్నారు. కానీ ఆ పిల్లాడు మాత్రం డాక్టర్ వైపు తిరిగి, డాక్టర్.. నేనింకా ఎంత సేపట్లో చచ్చిపోతాను. అని అడుగుతాడు. అది విని డాక్టర్ షాక్ అవుతాడు. రక్తం ఇస్తే చనిపోతాడని ఆ అబ్బాయి అనుకున్నాడు. అయినా కూడా ఇవ్వడానికి ఒప్పుకున్నాడు. నిస్వార్థమైన ప్రేమకి నిదర్శనం ఇంతకన్నా మరేదీ ఉండదేమో!
