ప్రస్తుతం ఇంగ్లాండ్‌లో పర్యటనలో ఉన్న భారత మహిళల జట్టు మూడు మ్యాచ్ ల టీ20 సిరీస్‌ ఆడుతుంది. ఈ సిరీస్‌లో భాగంగా శుక్రవారం రాత్రి జరిగిన తొలి టీ20లో భారత యువ మహిళా క్రికెటర్‌ హర్లీన్‌ డియోల్‌ అద్భుతమైన క్యాచ్‌ను అందుకున్న విషయం తెల్సిందే. హర్లీన్‌ క్యాచ్‌ను చూసిన మాజీ క్రికెటర్లు, పారిశ్రామిక వేత్తలు, రాజకీయ నాయకులు, అభిమానులు ఆమెను అభినందించారు. తాజాగా భారత ప్రధాని మోదీ కూడా హర్లీన్‌ క్యాచ్‌కు ఫిదా అయ్యారు. హర్లీన్‌ డియోల్‌ను అందుకున్న క్యాచ్‌ అద్భుతమని మోదీ ప్రశంసించారు. హర్లీన్‌ క్యాచ్‌కు సంబంధించిన వీడియోను మోదీ ఇన్‌స్టా రీల్స్‌లో పోస్ట్‌ చేసి.. అసాధారణం అని క్యాప్షన్ ఇచ్చారు.
తొలి టీ20లో భాగంగా ఇంగ్లాండ్‌ ఇన్నింగ్స్ లో శిఖా పాండే వేసిన 19 ఓవర్ ఐదో బంతిని అమీ జోన్స్‌ లాంగ్ ఆఫ్ మీదుగా ఆడింది. అయితే బంతి సిక్స్ పోయిందనుకున్న సమయంలో.. అక్కడే ఫీల్డింగ్ చేస్తున్న హర్లీన్‌ డియోల్‌ ఎడమవైపు గాల్లోకి డైవ్‌ చేసి బంతిని అందుకొంది. ఇక బాడీ బ్యాలన్స్ ఔట్ కావడంతో బౌండరీ అవతలకి దూకుతూ బంతిని గాల్లోకి విసిరింది. వెంటనే రెప్పపాటు క్షణంలో మళ్ళీ మైదానంలోకి డైవ్‌ దూకి సురక్షితంగా బంతిని ఓడిసిపట్టింది. అయితే ఈ మ్యాచ్ లో డక్ వర్త్ లూయిస్ ఇంగ్లాండ్‌ విజయం సాధించగా… రెండో టీ20లో భారత్ 8 పరుగుల తేడాతో విజయం సాధించి సిరీస్‌ను 1-1తో సమం చేసింది. ఇక జులై 14న జరగనున్న టీ20 మ్యాచ్ లో ఇరు జట్లు అమీతుమీ తేల్చుకోనున్నాయి.
