‘కాంతార’ సినిమాతో రిషభ్ శెట్టి పేరు దేశవ్యాప్తంగా మారుమోగిపోతోంది. ఆ మూవీకి దర్శకుడిగా, హీరోగా పనిచేసిన రిషభ్ శెట్టి ఇప్పుడు పాన్ ఇండియా స్టార్‌గా మారిపోయారు. మన తెలుగులోనూ ఫుల్ క్రేజ్ తెచ్చుుకున్నారు. దీంతో ఇప్పుడు ఆయనితో సినిమాలు చేసేందుకు అన్ని భాషల్లోని ప్రొడ్యూసర్లు క్యూ కడుతున్నారు. కానీ కథల ఎంపికలో ఆయన చాలా జాగ్రత్తగా వ్యవహరిస్తున్నారని తెలుస్తోంది.
ఒకవైపు దర్శకుడు, హీరోగా సినిమాలు చేస్తూనే.. ఎలాంటి పాత్రలనైనా చేసేందుకు సిద్ధంగా ఉన్నారు రిషభ్. అయితే ఇప్పుడు రిషభ్ గురించి ఓ ఆసక్తికర విషయం బయటకు వచ్చింది.
అదేంటంటే.. కాంతార సినిమా కంటే ముందే ఆయన ఓ తెలుగు సినిమాలో నటించారని తెలుసా? కానీ అప్పుడు రిషబ్ అంత పాపులర్ కాకపోవడంతో ఎవరూ గుర్తించలేదు. ఆ చిత్రంలో రిషబ్ శెట్టి పాత్ర చాలా చిన్నది. కేవలం రెండు నిమిషాలు మాత్రమే తెరపై కనిపిస్తారు. అదేమీ స్టార్ హీరో సినిమా కాదు. ముగ్గురు పిల్లల సినిమా ‘మిషన్ ఇంపాజిబుల్’. తాప్సీ ప్రధాన పాత్రలో నటించిన ఆ చిత్రంలో రిషభ్ ఓ దొంగ పాత్ర పోషించారు.
ఏజెంట్ సాయి శ్రీనివాస్ ఆత్రేయ మూవీతో హిట్ అందుకున్న దర్శకుడు స్వరూప్ ఆ ‘మిషన్ ఇంపాజిబుల్’ సినిమాను డైరెక్ట్ చేశారు. రఘుపతి రాఘవ రాజారామ్ అనే ముగ్గురు స్నేహితులు ముంబయి డాన్ దావుద్ ఇబ్రహీంను పట్టిస్తే లక్షల్లో డబ్బు వస్తుందని, ఎలాగైనా అతడిని పట్టుకోవాలని చెప్పి ఇంట్లో చెప్పకుండా ముంబయి వెళ్తారు. అయితే వాళ్ళు ఈ మిషన్ను ఎలా పూర్తి చేశారు.. చివరికి ఆ డబ్బును పొందారా..? లేదా అనేది కథలో కీలకాంశం.
ఇందులో భాగంగానే ఖలీల్ అనే దొంగ పాత్ర పోషించారు రిషభ్. గతంలో ఏజెంట్ సాయి శ్రీనివాస్ ఆత్రేయ మూవీ చూసిన రిషభ్ శెట్టి.. స్వరూప్‌తో స్వయంగా మాట్లాడి అభినందించారు. ఆ తర్వాత ఇద్దరి మధ్య స్నేహం పెరిగింది. దాంతో ఆ ఖలీల్ పాత్ర కోసం అడగ్గానే.. చేయడానికి రిషభ్ శెట్టి ఒప్పుకున్నారట. స్వరూప్‌తో ఉన్న ఫ్రెండ్‌షిప్ కారణంగా ఆ సినిమాకు కనీసం ఒక్క రూపాయి కూడా రిషబ్ తీసుకోలేదని సమాచారం.
