దర్శకధీరుడు ఎస్ఎస్ రాజమౌళి రూపొందించిన సినిమా ‘ఆర్ఆర్ఆర్’. ఈ ఏడాది మార్చిలో విడుదలై బాక్సాఫీస్ వద్ద రికార్డుల బద్దలు కొట్టింది. పీరియాడికల్ యూక్షన్ మూవీగా తెరకెక్కిన ఈ చిత్రం వసూళ్ల వర్షం కురిపించింది. కొమురం భీంగా జూనియర్ ఎన్టీఆర్, సీతారామరాజుగా రామ్చరణ్ అద్భుతంగా నటించి ప్రేక్షకుల్ని మెప్పించారు.
అయితే ‘ఆర్ఆర్ఆర్’ సినిమాకు సీక్వెల్ రావాలని ఎంతో మంది అభిమానులు కోరుకుంటున్నారు. ఈ నేపథ్యంలోనే దర్శకుడు రాజమౌళి స్పందించారు. ‘ఆర్ఆర్ఆర్’ మూవీ సీక్వెల్ పై క్లారిటీ ఇచ్చారు. ప్రస్తుతం చికాగో పర్యటనలో ఉన్న ఆయన.. ‘ఆర్ఆర్ఆర్’కు సీక్వెల్ రాబోతున్నట్లు వెల్లడించారు. అక్కడి అభిమానులు, మీడియా అడిగిన సీక్వెల్ ప్రశ్నలపై జక్కన్న స్పందించారు.
“నేను తీసే ప్రతీ సినిమా కథ మా నాన్న విజయేంద్ర ప్రసాద్ రాస్తారు. ‘ఆర్ఆర్ఆర్’ సినిమా కథను కూడా ఆయనే రాశారు. ఈ నేపథ్యంలోనే ‘ఆర్ఆర్ఆర్-2’ కథ పైనా చర్చలు జరుగుతున్నాయి. అవన్నీ ప్రస్తుతం ప్రాథమిక స్థాయిలోనే ఉన్నాయి” అని వెల్లడించారు.
మొత్తానికి ‘ఆర్ఆర్ఆర్’ మూవీకి సీక్వెల్ ఉంటుందని ఆయన క్లారిటీ ఇచ్చారు. ఈ ప్రకటనతో టాలీవుడ్తో పాటు దేశ, విదేశాల్లో సినీ అభిమానులు సంతోషం వ్యక్తం చేస్తున్నారు. రాబోయే సినిమా కూడా ప్రపంచవ్యాప్తంగా సంచలన విజయం అందుకుంటుందని చెబుతున్నారు.
ప్రస్తుతం రాజమౌళి.. మహేశ్ బాబుతో కలిసి ఓ సినిమా చేస్తున్నారు. ప్రపంచ యాత్రికుడిగా మహేశ్ ఈ సినిమాలో కనిపించనున్నట్లు ఇప్పటికే జక్కన్న క్లారిటీ ఇచ్చారు.
