మెగా పవర్‌స్టార్ రామ్చరణ్ హాలీవుడ్‌లో త్వరలోనే ఎంట్రీ ఇవ్వనున్నాడు. ఈ విషయాన్ని స్వయంగా తనే ప్రకటించాడు. త్వరలోనే తాను ఓ హాలీవుడ్ మూవీలో కనిపించబోతున్నట్లు చెప్పాడు. అయితే ఏ సినిమాలో నటిస్తున్నాడనే వివరాలు మాత్రం మరికొన్ని రోజుల్లో తెలుస్తాయని అన్నాడు. ప్రస్తుతం ఆస్కార్ అవార్డుల కోసం అమెరికా పర్యటనలో ఉన్న రామ్ చరణ్ అక్కడి ప్రముఖ షో టాక్ ఈజీ పాడ్ కాస్ట్‌లో మాట్లాడాడు.
ఈ పాడ్ కాస్ట్‌లో RRR మూవీ సంగతులతో పాటు తనకు ఇష్టమైన హాలీవుడ్ చిత్రాలు, నటీనటుల వివరాలు పంచుకున్నాడు. అన్నిదేశాల చిత్రాల్లో నటించాలని ఉందని రామ్ చరణ్ అన్నాడు. త్వరలోనే ఓ హాలీవుడ్ సినిమాలో నటిస్తానని ప్రస్తుతానికి చర్చలు కొనసాగుతున్నట్లు ప్రకటించాడు. అలాగే భారత్‌లో ప్రతి రాష్ట్రం దేనికదే ప్రత్యేకమని చరణ్ చెప్పాడు. ఉత్తరాది, దక్షిణాది అనే మాట చెరిపేసి భారతీయ సినిమా ఒక్కటేనని చాటిచెప్పేలా రాజమౌళితోపాటు తామంతా కృషిచేస్తున్నట్లు రామ్చరణ్ వివరించాడు.
