మరికొద్ది రోజుల్లో బతుకమ్మ పండుగ వస్తున్న నేపథ్యంలో రాష్ట్ర అధికారులు ఏర్పాట్లలో నిమగ్నమయ్యారు. ఇప్పటికే తెలంగాణ ఆడపడుచులకు బతుకమ్మ కానుకగా ఇచ్చే బతుకమ్మ చీరల పంపిణీ మొదలైంది. ఈసారి చీరలు చాలా అందంగా ఉన్నాయని రాష్ట్ర ఆడబిడ్డలు సంబుర పడుతున్నారు.
ఈ క్రమంలో సద్దుల బతుకమ్మ సమీపిస్తున్న వేళ ఏర్పాట్లపై అధికారులు సమావేశమయ్యారు. బతుకమ్మ వేడుకల నిర్వహణ ఏర్పాట్లపై బీఆర్కే భవన్లో సమన్వయ సమావేశం జరిగింది. వివిధ శాఖల ఉన్నతాధికారులతో సీఎస్ సోమేశ్ కుమార్, డీజీపీ మహేందర్ రెడ్డి భేటీ అయ్యారు. బతుకమ్మ వేడుకల కోసం చేయాల్సిన ఏర్పాట్లపై ఈ సమావేశంలో చర్చిస్తున్నారు.
గతేడాది కంటే రెండింతలు వైభవంగా ఈసారి బతుకమ్మ సంబురాలు చేసుకునేలా ఏర్పాట్లు చేయాలని అధికారులకు సీఎస్ సూచించారు. బతుకమ్మ సంబురాల్లో ఎలాంటి అపశ్రుతి చోటుచేసుకోకుండా పటిష్ఠ భద్రత ఏర్పాటు చేస్తామని డీజీపీ తెలిపారు. ఈ క్రమంలో భద్రతా ఏర్పాట్లపై పోలీసు అధికారులకు పలు సూచనలు చేశారు.
