టాలీవుడ్‌ సూపర్ స్టార్‌ కృష్ణకు కడసారి వీడ్కోలు పలికేందుకు ఏపీ సీఎం జగన్ హైదరాబాద్‌ రానున్నారు. నేడు ఉదయం సూపర్ స్టార్‌ కృష్ణ పార్థివ దేహానికి నివాళులర్పించిన అనంతరం.. ఆయన కుటుంబాన్ని పరామర్శించనున్నారు. దీనికి సంబంధించిన షెడ్యూల్‌ను ఏపీ సీఎం కార్యాలయం విడుదల చేసింది. ఈ రోజు ఉదయం 10 గంటలకు తాడేపల్లిలోని నివాసం నుంచి బయల్దేరనున్న సీఎం జగన్.. మధ్యాహ్నం 12 గంటలకు హైదరాబాద్‌ చేరుకుంటారు. సూపర్‌స్టార్‌ కృష్ణ భౌతికకాయానికి నివాళులర్పించి, వారి కుటుంబ సభ్యులను పరామర్శించిన తర్వాత.. మధ్యాహ్నం 2.20 గంటలకు తిరిగి తాడేపల్లి నివాసానికి చేరుకుంటారని సీఎంవో పేర్కొంది.
కాగా, సూపర్‌స్టార్‌ కృష్ణ భౌతికకాయాన్ని మంగళవారం రాత్రికి నానక్‌రామ్‌గూడలోని ఆయన నివాసంలో ఉంచారు. నేడు మహాప్రస్థానంలో కృష్ణ అంత్యక్రియలు జరుగనున్నాయి. అయితే.. ఉదయం 7 గంటలకు పద్మాలయ స్టూడియోకు కృష్ణ భౌతికకాయం తరలించనున్నారు. అభిమానుల సందర్శనార్థం మధ్యాహ్నం 12 గంటలకు వరకు కృష్ణ భౌతికకాయం పద్మాలయ స్టూడియోలో ఉంచనున్నారు. తర్వాత అధికార లాంఛనాలతో కృష్ణ అంత్యక్రియలు నిర్వహించనున్నారు.
