తెలంగాణకు రావాల్సిన బకాయిలు విడుదల చేయాలని డిమాండ్‌ చేస్తూ… కేంద్రానికి మంత్రి హరీశ్ రావు మరోసారి లేఖ రాశారు. కేంద్ర ప్ర‌భుత్వం నుంచి తెలంగాణ రాష్ట్రానికి రావాల్సిన గ్రాంట్ల‌ను విడుదల చేయాలంటూ ఆర్థిక శాఖ మంత్రి త‌న్నీరు హరీశ్రావు కేంద్ర ఆర్థిక మంత్రి నిర్మ‌లా సీతారామ‌న్‌కు ఇవాళ లేఖ రాశారు మంత్రి హరీష్‌ రావు. గతంలో చేసిన అభ్యర్థనలను ఈ లేఖలో గుర్తు చేశారు.
ఇవే అంశాలతో ఈ ఏడాది జనవరి 24న లేఖ రాసిన విషయం తెలిసిందే.. A.P. పునర్వ్యవస్థీకరణ చట్టంలోని సెక్షన్ 94 (2) ప్రకారం వెనుకబడిన ప్రాంతాల అభివృద్ధికి కేటాయించిన నిధుల్లో రెండేండ్ల బ‌కాయి రూ.900 కోట్లు ఇంకా విడుదల చేయాల్సి ఉన్న‌దని… వీటిని విడుదల చేయడంతోపాటు గ్రాంట్‌ను 2021-22 తర్వాత ఐదేళ్లపాటు పొడిగించాలని కోరుతున్నానని మంత్రి హరీశ్ రావు లేఖలో పేర్కొన్నారు.
నీతిఆయోగ్ సూచించిన మేర‌కు రూ.24,205 కోట్లు విడుదల చేయాల్సిందిగా విన్న‌విస్తున్నానని హరీష్‌ రావు వెల్లడించారు. స్థానిక సంస్థలకు రూ.817.61 కోట్లు (గ్రామీణ స్థానిక సంస్థలకు రూ. 315.32 కోట్లు, పట్టణ స్థానిక సంస్థలకు రూ. 502.29 కోట్లు) ఇవ్వాల‌న్న 14వ ఆర్థిక సంఘం సిఫార‌సుల‌ను కేంద్రం అకారణంగా తిర‌స్క‌రించిందని… రాష్ట్రం అన్ని షరతులను పూర్తి చేసినప్పటికీ, నిర్దిష్ట కారణం లేకుండా ఈ గ్రాంట్ల‌ను తిర‌స్క‌రించారు… కాబట్టి వీటిని వీలైనంత త్వరగా విడుదలయ్యేలా చూడాలని అభ్యర్థిస్తున్నానని పేర్కొన్నారు.
