‘నేను వెళ్తున్నాను. ఇక నుంచి ఈ జిల్లా బాధ్యతలు మీరే చూసుకోండి.’ అని ఓ జిల్లా కలెక్టర్ తన భర్తకు బాధ్యతలను అప్పగించి వెళ్లిపోయారు. సాధారణంగా సర్పంచ్, ఎంపీటీసీ వంటి పదవుల్లో భార్యలు గెలిస్తే పెత్తనం భర్తలు చేయడం చూస్తుంటాం. ఇది కూడా అలాంటి సంఘటనే అనుకుంటే మీరు తప్పులో కాలేసినట్లే. అసలు సంగతేంటో తెలుసుకోవాలంటే ఈ స్టోరీ చదివేయండి మరి..
కేరళలోని అలప్పుళ జిల్లా కలెక్టరేట్ మంగళవారం ఓ అరుదైన సంఘటనకు వేదికైంది. జిల్లా కలెక్టర్ బాధ్యతల్ని భర్తకు అప్పగించి వెళ్లిపోయారు భార్య. అదే సమయంలో కాంగ్రెస్ నేతృత్వంలోని ప్రతిపక్ష యూడీఎఫ్ కూటమికి చెందిన కార్యకర్తలు.. కలెక్టరేట్ బయట తీవ్రస్థాయిలో నిరసనలు చేపట్టారు. ఈ అధికార బదిలీని వ్యతిరేకించారు.
ఇదంతా ఎందుకంటే.. రేణు రాజ్.. ఇప్పటివరకు అలెప్పీ కలెక్టర్ గా పనిచేశారు. ఇటీవలే ఆమెను బదిలీ చేస్తూ ప్రభుత్వం ఉత్తర్వులు జారీ చేసింది. ఆమె స్థానంలో శ్రీరామ్ వెంకట్రామన్ను నియమించింది. రేణు, శ్రీరామ్.. భార్యాభర్తలు కావడం విశేషం. వృత్తిరీత్యా వైద్యులైన వారిద్దరూ తర్వాత ఐఏఎస్లుగా మారారు. ఈ ఏడాది ఏప్రిల్లో పెళ్లి చేసుకున్నారు. ఇప్పటివరకు కేరళ ప్రభుత్వంలో జాయింట్ సెక్రటరీగా పనిచేశారు శ్రీరామ్. మంగళవారం భార్య రేణు నుంచి అలప్పుళ జిల్లా కలెక్టర్గా బాధ్యతలు చేపట్టారు.
నిరసనల స్వాగతం.. ఇంతటి అరుదైన సన్నివేశానికి వేదికైన అలెప్పీ కలెక్టరేట్.. అదే సమయంలో నిరసనలతో హోరెత్తింది. శ్రీరామ్కు కలెక్టర్ బాధ్యతలు అప్పగించడాన్ని తప్పుబడుతూ యూడీఎఫ్ కార్యకర్తలు ఆందోళన చేపట్టారు. గతంలో శ్రీరామ్ వెంకట్రామన్పై నమోదైన కేసే ఇందుకు కారణం.
2019లో శ్రీరామ్.. తన స్నేహితురాలు వఫా ఫిరోజ్తో కలిసి కారులో వేగంగా వెళ్తూ.. ఓ ద్విచక్రవాహనాన్ని ఢీకొట్టారు. ఆ బైక్పై ప్రయాణిస్తున్న జర్నలిస్ట్ మృతిచెందారు. ఈ కేసులో బెయిల్ పొంది, విచారణ ఎదుర్కొంటున్న శ్రీరామ్ను కేరళ ప్రభుత్వం 2020లో తిరిగి విధుల్లోకి తీసుకుంది. అయితే.. ఇప్పుడు కలెక్టర్ పోస్టు ఇవ్వడంపై కాంగ్రెస్ తీవ్ర అభ్యంతరం వ్యక్తం చేసింది. “జిల్లా కలెక్టర్ అంటే జిల్లా మెజిస్ట్రేట్. ‘నిందితుడు’ అయిన వ్యక్తి ప్రజలకు ఎలా న్యాయం చేయగలరు?” అనేది కాంగ్రెస్ వాదన.
