ఉక్రెయిన్‌లో శాంతి సాధనే లక్ష్యంగా స్విట్జర్లాండ్‌ నిర్వహించిన రెండు రోజుల సదస్సులో దాదాపు 100 దేశాలు పాల్గొన్నాయి. రష్యా-ఉక్రెయిన్ యుద్ధం ముగింపు కోసం జరిగే ఏ శాంతి ఒప్పందానికైనా ఉక్రెయిన్ ప్రాదేశిక సమగ్రతే ప్రాతిపదిక కావాలని 80 దేశాలు సంయుక్త ప్రకటన విడుదల చేశాయి. ఈ ప్రకటనపై మెజారిటీ దేశాలు అంగీకరించాయి. కానీ భారత్, యూఏఈ తదితర దేశాలు ఏకీభవించలేదు.
‘ఉక్రెయిన్‌లో శాంతి’ అంశంపై స్విట్జర్లాండ్‌లోని బర్జెన్‌స్టాక్‌ రిసార్టులో రెండు రోజుల పాటు ఈ సదస్సు జరిగింది. రష్యా-ఉక్రెయిన్ యుద్ధాన్ని ఆపడం, అణు భద్రత, ఆహార భద్రత, ఖైదీల మార్పిడి వంటి అంశాలపై ఈ సదస్సులో విస్తృతంగా చర్చించారు. ఐక్యరాజ్య సమితి ఒప్పందాలతో పాటు ఉక్రెయిన్ సార్వభౌమత్వం, ప్రాదేశిక సమగ్రతలను గౌరవించేలా యుద్ధం ముగించే దిశగా కీలక ఒప్పందం కుదరాలని ప్రకటనలో వారు పేర్కొన్నారు. ఈ ప్రకటనపై భారత్, సౌదీఅరేబియా, దక్షిణాఫ్రికా, యూఏఈ, బ్రెజిల్ సంయుక్త ప్రకటనపై సంతకాలు చేయలేదు. వీటికి రష్యాతో బలమైన సంబంధాలు ఉన్నాయి. ఉక్రెయిన్‌లో శాంతియుత పరిష్కార మార్గం కోసం అన్ని వర్గాలతో కలిసి పనిచేస్తామని భారత్ స్పష్టం చేసింది.
