త్రిపుర ముఖ్యమంత్రిగా మాణిక్ సాహా ఇవాళ ప్రమాణ స్వీకారం చేయనున్నారు. ఈ కార్యక్రమానికి ప్రధాన మంత్రి నరేంద్ర మోదీ హాజరు కానున్నారు. 60 సీట్లున్న త్రిపుర అసెంబ్లీలో బీజేపీ 32 సీట్లు గెలిచిన విషయం తెలిసిందే.
‘మిస్టర్ క్లీన్’గా పేరున్న మాణిక్ సాహా టౌన్ బర్దోవాలి నుంచి 1,257 ఓట్ల తేడాతో కాంగ్రెస్ అభ్యర్థి అశిశ్ కుమార్ సాహాపై విజయం సాధించారు. ఈ క్రమంలో రెండో సారి కూడా త్రిపుర ముఖ్యమంత్రి పీఠం మాణిక్ సాహానే వరిస్తోంది. మాణిక్ సాహా 2022లోనే త్రిపుర ముఖ్యమంత్రిగా బాధ్యతలు చేపట్టారు.
అప్పటి నుంచి పార్టీ అసమ్మతి నేతలను కలుపుకుంటూ ముందుకు సాగారు. అలాగే క్లీన్ ఇమేజ్ను సంపాదించుకున్నారు. సాహా.. స్వతహాగా వైద్యుడు. స్థానికంగా ఆయనకు మంచి పేరు ఉండడం పార్టీ విజయంలో సహాయపడిందని విశ్లేషకులు అంటున్నారు.
2018లో మూడు దశాబ్దాల వామపక్షాల పాలనకు చరమగీతం పాడి అధికారంలోకి వచ్చిన బీజేపీ.. సీఎం పీఠాన్ని బిప్లవ్ కుమార్ దేవ్కు అప్పగించింది. ఆయన వివాదస్పద వ్యాఖ్యలు, శాంతి భద్రతలు నెలకొల్పడంలో విఫలమయ్యారు. దీంతో ఆయనను తప్పించి బీజేపీ అధిష్ఠానం మాణిక్ సాహాను 2022లో సీఎం పీఠంపై కూర్చోబెట్టింది.
