అబుధాబిలో బుధ‌వారం జ‌రిగిన ఐపీఎల్ 5వ మ్యాచ్‌లో కోల్‌క‌తా నైట్ రైడ‌ర్స్‌పై ముంబై ఇండియ‌న్స్ ఘ‌న విజ‌యం సాధించింది. కోల్‌క‌తాపై ముంబై 49 ప‌రుగుల తేడాతో గెలుపొందింది. ముంబై విధించిన 196 ప‌రుగుల ల‌క్ష్యాన్ని ఛేదించే క్ర‌మంలో కోల్‌క‌తా త‌డ‌బ‌డింది. ఎప్ప‌టిక‌ప్పుడు ఆ జ‌ట్టు వికెట్ల‌ను కోల్పోతూ వ‌చ్చింది. దీంతో ముంబై సునాయాసంగా విజ‌యం సాధించింది.
మ్యాచ్‌లో ముందుగా కోల్‌క‌తా నైట్ రైడ‌ర్స్ జ‌ట్టు టాస్ గెలిచి ఫీల్డింగ్ ఎంచుకోగా ముంబై బ్యాటింగ్ చేపట్టింది. ఈ క్ర‌మంలో నిర్ణీత 20 ఓవ‌ర్ల‌లో ముంబై 5 వికెట్ల న‌ష్టానికి 195 ప‌రుగులు చేసింది. ముంబై బ్యాట్స్‌మెన్ల‌లో కెప్టెన్ రోహిత్ శ‌ర్మ (80 ప‌రుగులు, 3 ఫోర్లు, 6 సిక్స‌ర్లు), సూర్య‌కుమార్ యాద‌వ్ (47 ప‌రుగులు, 6 ఫోర్లు, 1 సిక్స‌ర్‌)లు రాణించారు. దీంతో ముంబై భారీ స్కోరు చేయ‌గ‌లిగింది. ఇక కోల్‌క‌తా బౌల‌ర్ల‌లో శివం మావికి 2 వికెట్లు ద‌క్క‌గా, సునీల్ న‌రైన్‌, ఆండ్రూ ర‌స్సెల్‌లు చెరొక వికెట్ తీశారు.
అనంత‌రం బ్యాటింగ్ ప్రారంభించిన కోల్‌క‌తా 20 ఓవ‌ర్ల‌లో 9 వికెట్ల న‌ష్టానికి 146 ప‌రుగులు మాత్ర‌మే చేయ‌గ‌లిగింది. ఆ జ‌ట్టు బ్యాట్స్‌మెన్ల‌లో ప్యాట్ క‌మిన్స్ (33 ప‌రుగులు, 1 ఫోర్‌, 4 సిక్స‌ర్లు), కెప్టెన్ కార్తీక్ (30 ప‌రుగులు, 5 ఫోర్లు)లు మాత్ర‌మే ఫ‌ర్వాలేద‌నిపించారు. మిగిలిన బ్యాట్స్‌మెన్ ఎవ‌రూ ఆక‌ట్టుకునే ప్ర‌ద‌ర్శ‌న చేయ‌లేదు. ముంబై బౌల‌ర్ల‌లో ట్రెంట్ బౌల్ట్‌, ప్యాటిన్‌స‌న్‌, బుమ్రా, చాహ‌ర్‌లు త‌లా 2 వికెట్లు తీశారు. పొల్లార్డ్‌కు 1 వికెట్ ద‌క్కింది.
