రోజురోజుకు టమాట ధరలు ఆకాశాన్నంటుతున్నాయి. టమాట ధరల పెరుగుదలతో వీటి చుట్టూ జరుగుతున్న కథలు కూడా చాలా ఆసక్తికరంగా ఉంటున్నాయి. తాజాగా ఇలాంటి ఓ ఇంట్రెస్టింగ్ సంఘటన చండీగఢ్లో చోటుచేసుకుంది. ఆ రాష్ట్రానికి చెందిన ఓ ఆటో డ్రైవర్ తన ప్రయాణికులకు వెరైటీ ఆఫర్ ప్రకటించాడు. ఇంతకీ ఆ ఆఫర్ ఏంటంటే..?
చండీగఢ్‌కు చెందిన ఆటో డ్రైవర్ అరుణ్‌ తన ఆటోలో ప్రయాణించేవారికి ఉచితంగా కిలో టమాటాలు అందిస్తున్నాడు. ఇందుకు అతను ఓ కండిషన్ పెట్టాడు. అదేంటంటే.. తన ఆటోలో కనీసం అయిదుసార్లు ప్రయాణించిన వారికే ఈ సదుపాయం కల్పిస్తున్నాడు. గత 12 ఏళ్లుగా ఆటో నడుపుతున్న అరుణ్‌ దేశవ్యాప్తంగా టమాటా ధరలు ఆకాశాన్ని తాకడంతో ప్రజలకు తన వంతు సాయం చేయాలని ఈ నిర్ణయం తీసుకున్నట్లు తెలిపాడు. ఈ మేరకు ఆటో వెనుక అరుణ్‌ అంటించిన టమాటా పోస్టర్‌ వైరల్‌గా మారింది. తన ఆటోలో గర్భిణులకు, ప్రమాద బాధితులకు ఉచిత ప్రయాణం అందిస్తున్నందుకు చండీగఢ్ పోలీసుల నుంచి ఈయన సత్కారం కూడా అందుకున్నాడు.
