భారత రెజ్లింగ్ సమాఖ్య అధ్యక్షుడు, బీజేపీ ఎంపీ బ్రిజ్ భూషణ్ గత కొంతకాలంగా లైంగిక వేధింపుల ఆరోపణలు ఎదుర్కొంటున్న విషయం తెలిసిందే. భారత మహిళా రెజ్లర్లు.. బ్రిజ్ భూషణ్ తమను లైంగికంగా వేధించాడని.. అసభ్యకరంగా ప్రవర్తించాడని దిల్లీలో ఆందోళనకు దిగారు. అయితే ఈ విషయంపై ఫోకస్ పెట్టి కేంద్రం.. ఈ వ్యవహారంపై విచారణ జరపాలని దిల్లీ పోలీసులను ఆదేశించింది. ఈ కేసుపై దర్యాప్తు షురూ చేసిన దిల్లీ పోలీసులు బ్రిజ్ భూషణ్ వేధించాడనడానికి సరైన ఆధారాలు చూపాలని రెజ్లర్లను కోరారు.
అయితే తాజాగా బ్రిజ్ భూషణ్పై నమోదైన పోక్సో కేసును ఎత్తివేసేందుకు అనుమతించేలా దిల్లీ పోలీసులు న్యాయస్థానాన్ని కోరుతూ నివేదిక సమర్పించారు. రెజ్లర్లను వేధించారన్న కేసులో 500 పేజీల ఛార్జ్షీట్ దాఖలు చేసిన పోలీసులు.. మైనర్ ఆరోపణలపై నమోదైన కేసును రద్దు చేయాల్సిందిగా కోరారు. మైనర్ రెజ్లర్ ఆరోపణలపై ఎలాంటి ఆధారాలు లభించలేదని పోలీసులు ఛార్జ్షీట్లో పేర్కొన్నారు. బాలిక, ఆమె తండ్రి ఇచ్చిన వాంగ్మూలం మేరకు పోక్సో కేసు రద్దుకు సంబంధించి నివేదిక సమర్పిస్తున్నట్లు కోర్టుకు తెలిపారు. మరోవైపు, మిగతా రెజ్లర్ల ఆరోపణలపై ఛార్జ్షీట్ నమోదు చేసినట్లు దిల్లీ పోలీసులు తెలిపారు.
