కేరళ కథ : ప్రస్తుతం దేశ రాజకీయాల్లో ముఖ్యంగా కేరళ రాజకీయాల్లో ద కేరళ స్టోరీ మామూలు ప్రకంపనలు సృష్టించలేదు. ఈ సినిమాపై ఓవైపు అధికార పక్షం.. మరోవైపు ప్రతిపక్షం.. అందరూ వ్యతిరేకత వ్యక్తం చేస్తున్నారు. ఈ సినిమాలో విద్వేషపూరిత ప్రసంగాలు ఉన్నాయని.. అందువల్ల ఈ చిత్రం విడుదలను నిలిపివేయాలని సర్వత్రా డిమాండ్లు వెల్లువెత్తుతున్నాయి.
తాజాగా ‘ద కేరళ స్టోరీ’ సినిమా విడుదలపై స్టే విధించాలని కోరుతూ దాఖలైన పిటిషనుపై విచారణకు సుప్రీంకోర్టు తిరస్కరించింది. వచ్చే శుక్రవారం విడుదల కానున్న ఈ సినిమా ట్రైలర్‌ 1.60 కోట్ల వ్యూస్‌ సాధించినట్లు సీనియర్‌ న్యాయవాది కపిల్‌ సిబల్‌, మరో న్యాయవాది నిజాం పాషా మంగళవారం జస్టిస్‌ కె.ఎం.జోసెఫ్‌, జస్టిస్‌ బి.వి.నాగరత్నల ధర్మాసనం దృష్టికి తీసుకువచ్చారు. ఈ సినిమా ఘోరమైన ద్వేషపూరిత ప్రసంగాల ప్రచారమని నిజాం పాషా పేర్కొన్నారు.
‘‘ద్వేషపూరిత ప్రసంగాల్లో పలు రకాలు ఉంటాయి. ఈ సినిమాకు సెన్సార్‌బోర్డు సర్టిఫికెటు ఇచ్చింది. కాబట్టి, దీన్ని వ్యక్తిగత ప్రసంగం కింద పరిగణించలేం. ఒకవేళ మీరు సినిమా విడుదలను సవాలు చేయదలచుకుంటే తగిన వేదిక మీద సెన్సార్‌ సర్టిఫికెటును సవాలు చేయాలి’’ అని న్యాయవాదిని ఉద్దేశించి ధర్మాసనం పేర్కొంది.
