ఎన్నికల వ్యూహకర్త ప్రశాంత్ కిశోర్తో బిహార్ ముఖ్యమంత్రి నితీశ్ కుమార్ మంగళవారం భేటీ అయ్యారు. ఈ భేటీ పట్ల రాజకీయ వర్గాల్లో సర్వత్రా ఆసక్తి నెలకొంది. అయితే నితీశ్ పీకేను ఎందుకు కలిశారనేదానిపై మాత్రం క్లారిటీ రాలేదు. ఈ క్రమంలో పీకేతో పట్నాలో భేటీ అయిన మాట వాస్తవమేనని నితీశ్ కుమార్ తెలిపారు. ఈ భేటీకి రాజకీయ ప్రాధాన్యం ఉందా లేదా అనే దానిపై క్లారిటీ ఇచ్చేందుకు మాత్రం నితీశ్ నిరాకరించారు.
నీతీశ్ కుమార్, ప్రశాంత్ కిశోర్ మంగళవారం సాయంత్రం పట్నాలో భేటీ అయ్యారు. ఈ సమావేశం రాజకీయ వర్గాల దృష్టిని ఆకర్షించింది. ఇదే విషయమై బుధవారం నీతీశ్ను మీడియా మరింత స్పష్టత కోరగా.. ఆయన దాటవేశారు. పీకేతో తనకు ఎప్పటి నుంచో అనుబంధం ఉందని, అలాంటి వ్యక్తిని కలవడంలో ఇబ్బంది ఏంటని ప్రశ్నించారు. ఎన్నికల కోసం ప్రశాంత్తో మళ్లీ కలిసి పనిచేస్తారా అని అడగ్గా.. ఆ ప్రశ్నను పీకేనే అడగాలని మీడియా ప్రతినిధులకు సూచించారు బిహార్ సీఎం.
