తెలంగాణ విద్యార్థులకు అలర్ట్. ఎంసెట్ లో ఇంటర్ మార్కులకు 25 శాతం వెయిటేజీని శాశ్వతంగా తొలగించాలని ప్రభుత్వం నిర్ణయించినట్లు సమాచారం. దీనిపై త్వరలో జీవో వెలువడనుంది. ప్రస్తుతానికి ఈ ఏడాదికి ఇంటర్ మార్కులకు వెయిటేజీ ఉండదని రాష్ట్ర ఉన్నత విద్యామండలి తాజాగా ప్రకటించినా శాశ్వతంగా తొలగిస్తూ జీవో జారీ చేయనుందని తెలిసింది.
ఇప్పటివరకు ఎంసెట్ మార్కులకు 75%, ఇంటర్లోని భాషేతర సబ్జెక్టుల మార్కులకు 25 శాతం వెయిటేజి ఇచ్చి తుది ర్యాంకును నిర్ణయిస్తున్నారు. కరోనా కారణంగా 2020, 2021, 2022 ఎంసెట్ లో ఇంటర్ మార్కులకు వెయిటేజీ తొలగించారు. ఈ ఎంసెట్ నుంచి ఇంటర్ మార్కులకు వెయిటేజీ శాశ్వతంగా ఉండదు. ప్రవేశ పరీక్షలో, తొలుత గణితం, ఆ తర్వాత భౌతికశాస్త్రం, చివరగా రసాయన శాస్త్రంలో వచ్చిన మార్కుల ఆధారంగా ర్యాంకు నిర్ణయిస్తారు. కొద్ది సంవత్సరాలుగా ఆన్లైన్ పరీక్షలు నిర్వహిస్తున్నందున ఒకటికి మించి ఎక్కువ ప్రశ్నపత్రాలు ఉండటంతో మార్కులు కాకుండా పర్సంటేజ్ ను లెక్కిస్తున్నారు.
