సికింద్రాబాద్ పరిధి నల్లగుట్టలోని ఓ షాపింగ్‌మాల్‌లో అగ్నిప్రమాదం జరిగిన సంఘటన తెలిసిందే. డెక్కన్‌ నైట్‌వేర్‌ స్పోర్ట్స్‌ షోరూంలో మంటలు ఇంకా ఎగిసిపడుతున్నాయి. ఆరు అంతస్తుల భవనంలో కింద కార్ల విడి భాగాల గోదాం, పైన స్పోర్ట్స్‌ షోరూం నిర్వహిస్తున్నారు.
ఉదయం 11 గంటల సమయంలో గోదాంలో షార్ట్ సర్క్యూట్‌ కావడంతో మంటలు చెలరేగాయి. ఆ మంటలు పైఅంతస్తులో ఉన్న షోరూంకు అంటుకోవడంతో భారీగా పొగలు వ్యాపించాయి. సమాచారం అందుకున్న అగ్నిమాపక సిబ్బంది ఫైర్‌ ఇంజిన్ల సాయంతో మంటలను ఆర్పుతున్నారు. భవనం మూడు వైపుల నుంచి 15 ఫైరింజిన్లతో మంటలార్పుతున్నారు.
ఇప్పటి వరకు లోపల చిక్కుకున్న ఐదుగురిని సురక్షితంగా బయటకు తీసుకువచ్చారు అగ్నిమాపక సిబ్బంది. లోపల ఇంకా ఎవరూ లేరనే నిర్ధారణకు వచ్చారు. అగ్ని ప్రమాదం జరిగిన ఆ భవనం ఏ క్షణమైనా కూలవచ్చని ఈవీడీఎం డైరెక్టర్ విశ్వజిత్ తెలిపారు. భవనం కూలినా ఇబ్బందులు తలెత్తకుండా చర్యలు తీసుకున్నట్లు వెల్లడించారు. అన్ని జాగ్రత్తలు తీసుకుంటున్నామని చెప్పారు.
