ప్రస్తుతం ఏపీలో రెండు కామెంట్లు బాగా హల్ చల్ చేస్తున్నాయి. విచిత్రం ఏమిటంటే… ఆ రెండు కామెంట్లూ చేస్తున్నవారు.. ఇతర పార్టీలపై కాకుండా, సొంతపార్టీలపైనే విమర్శలు చేస్తున్నారు. స్వపక్షంలోనే విపక్షపాత్ర పోషిస్తున్నారు. అయితే విచిత్రం ఏమిటంటే… వీరిద్దరిలో ఏ ఒక్కరి కామెంట్ నిజమైనా… పవన్ కు ప్లస్ అవ్వాలి.. వీరిద్దరి కామెంట్లు రెండూ కరెక్టే అయినా కూడా పవన్ కే ప్లస్ అవ్వాలి? కానీ… ఆ టాపిక్కే రావడం లేదు ఎందుకో ఇప్పుడు చూద్దాం!
యువజనశ్రామికరైతు కాంగ్రెస్ ఎంపీ రఘురామకృష్ణంరాజు తాజాగా తాను చేయించాను అని చెప్పిన ఒక సర్వేపై స్పందించారు. ఆ సర్వే ప్రకారం ఇప్పుడు ఎన్నికలు జరిగితే వైకాపాకు 50సీట్ల కంటే ఎక్కువ రావని! అదే నిజమైతే… టీడీపీ అధికారంలోకి వస్తాదనే కదా అర్థం! అనుకుంటే… అంత సాహసం మాత్రం ఆర్.ఆర్.ఆర్. చేయలేదు! ఇక మిగిలింది జనసేనే కదా.. ఆ క్లారిటీ కూడా ఇవ్వలేదు!
ఇక తాజాగా టీడీపీ నేత జేసీ ప్రభాకర్ రెడ్డి.. తన పార్టీపై స్పందించారు. ఇప్పుడు ఎన్నికలు జరిగితే టీడీపీ కచ్చితంగా ఓడిపోతుందని తెగేసి చెప్పారు. అంటే… వైకాపా మళ్లీ అధికారంలోకి వస్తుందనే కదా! కానీ.. ఆ మాట స్పష్టం చేయలేదు! పోనీ జనసేనకు ఛాన్స్ ఉంటుందా అంటే… ఆ ఊసే ఎత్తలేదు!
ఇలా అటు వైకాపాలో విపక్షం అయినా.. టీడీపీలో ముక్కుసూటిగా మాట్లాడే నేతలైనా.. టీడీపీ అధికారంలోకి రాదు – వైకాపా అధికారంలోకి రాదు అని చెబుతున్నారు. అందుకు ఒకరు సర్వేని నమ్ముకుంటే.. మరొకరు జోస్యాన్ని వెళ్లబుచ్చారు! మరి ఇప్పుడు ఈ రెండు పార్టీలు కాకుండా మరోపార్టీ కూడా ఏపీలో ఉంది. అదే జనసేన! వీరి సర్వే కానీ, వీరి జోస్యం కానీ… నిజమైతే కచ్చితంగా జనసేన అధికారంలోకి రావాలి మరి! అది జరిగే పనేనా… ఆ విషయం పవన్ కూడా స్పష్టంగా చెప్పలేని పరిస్థితి!
మరి వీరి సర్వేలు, జోస్యాలు… ఎవరి ఆత్మసంతృప్తి కోసం, ఎవరిని ఏమార్చడం కోసం? విచిత్రం ఏమిటంటే… వీరిద్దరి లక్ష్యము ఒకటే… చంద్రబాబు సీఎం అవ్వాలని – అంతకంటే ముందు జగన్ కు జనాల్లో వ్యతిరేకత పోగవ్వాలని! మరో విచిత్రం ఏమిటంటే… వీరి ఆశలు నెరవేర్చే పని చంద్రబాబు ఇప్పటివరకూ ఒక్కటికూడా చేయలేదు! తానూ రేసులో ఉన్నాననే కార్యక్రమం పవన్ ఇంకా చేపట్టలేదు!
