ముఖ్యమంత్రి రేవంత్ రెడ్డి ఇచ్చిన మాట నిలబెట్టుకున్నారు. త్వరలోనే విద్యుత్ విచారణ కమిషన్కు కొత్త ఛైర్మన్ను నియమిస్తామని అసెంబ్లీలో మాటిచ్చారు. అన్నట్టుగానే మంగళవారం రోజున ఆయన ఆ హామీ నిలబెట్టుకున్నారు. యాదాద్రి, భదాద్రి థర్మల్‌ విద్యుత్కేంద్రాల నిర్మాణం, ఛత్తీస్‌గఢ్‌ నుంచి కరెంటు కొనుగోలుకు సంబంధించి గత ప్రభుత్వం తీసుకున్న నిర్ణయాలపై నిజానిజాలు తేల్చేందుకు ఏర్పాటు చేసిన విచారణ కమిషన్కు ఛైర్మన్‌గా సుప్రీంకోర్టు మాజీ న్యాయమూర్తి జస్టిస్‌ మదన్‌ బి.లోకూర్‌ను నియమించింది.
ఈ మేరకు రాష్ట్ర ప్రభుత్వం మంగళవారం రోజున ఉత్తర్వులు జారీచేసింది. గతంలో ఈ కమిషన్‌ ఛైర్మన్‌గా ఉన్న జస్టిస్‌ ఎల్‌.నరసింహారెడ్డి స్థానంలో జస్టిస్‌ లోకూర్‌ బాధ్యతలు స్వీకరించనున్నారు. జస్టిస్‌ ఎల్‌.నరసింహారెడ్డి కమిషన్‌ ఏర్పాటును సవాలు చేస్తూ మాజీ ముఖ్యమంత్రి కె.చంద్రశేఖర్‌రావు సుప్రీంకోర్టును ఆశ్రయించగా.. ఈ కేసు విచారణ సమయంలోనే జులై 16న జస్టిస్‌ ఎల్‌.నరసింహారెడ్డి కమిషన్‌ ఛైర్మన్‌ పదవి నుంచి తప్పుకొంటూ రాజీనామా లేఖ పంపారు. ప్రస్తుతం ఆయన స్థానంలో కమిషన్‌ ఛైర్మన్‌గా జస్టిస్‌ మదన్‌ బి.లోకూర్‌ను ప్రభుత్వం నియమించింది.
