ఇవాళ ఆసియా కప్ లో భాగంగా.. దయాదుల పోరు జరుగనున్న సంగతి తెలిసిందే. ఈ నేపథ్యంలోనే.. టీమిండియా మాజీ కెప్టెన్ విరాట్ కోహ్లీకి బీసీసీఐ అధ్యక్షుడు సౌరవ్ గంగూలీ స్వీట్ వార్నింగ్ ఇచ్చాడు. ఆసియా కప్ టోర్నీలో కోహ్లీ ఫామ్ లోకి రావాలని ఆకాంక్షించిన దాదా కనీసం తన కోసమైనా ఆడాల్సిన పరిస్థితి నెలకొంది అని చెప్పాడు.
ఈ టోర్నీలో రాణించకుంటే కోహ్లీ కెరీర్ ముగిసే ప్రమాదం ఉందని పరోక్షంగా ప్రస్తావించాడు. ఇక పాకిస్తాన్ తో మ్యాచ్ పెద్ద విషయమే కాదన్న దాదా, ఈ మ్యాచ్ ఒత్తిడిని ఎలా అధిగమించాలో భారత ఆటగాళ్లకు తెలుసని చెప్పుకొచ్చాడు. ఆసియా కప్ 2022 టోర్నీలో భాగంగా ఆదివారం భారత్, పాకిస్తాన్ లు తొలి మ్యాచ్ ఆడనున్నాయి.
ఈ మ్యాచ్ నేపథ్యంలో ఓ జాతీయ ఛానల్ తో మాట్లాడిన దాదా ఆసక్తికర వ్యాఖ్యలు చేశాడు. ‘విరాట్ కోహ్లీ కేవలం దేశం కోసం మాత్రమే కాదు, తన కోసం తాను పరుగులు చేయాల్సి ఉంది. ఈ సీజన్ కోహ్లీకి గొప్పగా ఉంటుందని ఆశిస్తున్న. తను తిరిగి ఫామ్ లోకి వస్తాడని మాకు నమ్మకం ఉంది. అందరిలాగే మేము కూడా తను శతకం బాదితే చూడాలని కోరుకుంటున్నాం. అందుకు తగ్గట్లుగా కోహ్లీ కష్టపడుతున్నాడు కూడా’ అని దాదా చెప్పుకొచ్చాడు.
