సాధారణంగా చిన్న సినిమా అయినా.. పెద్ద సినిమా అయినా ప్రస్తుతం ప్రీ రిలీజ్ ఈవెంట్ అనేది సర్వసాధారణమే. ప్రమోషన్లలో కీలకంగా భావించే ప్రీ రిలీజ్ ఈవెంట్ లో ఈ చిత్రంలో పని చేసిన వారందరూ పాల్గొనేలా నిర్మాతలు ప్లాన్ చేస్తుంటారు. అలాంటిది ఏకంగా హీరోనే లేకుండా ప్రీ రిలీజ్ ఈవెంట్ వేడుక నిర్వహించడం మనం అసలు ఊహించగలమా..? కానీ రాజ్ తరుణ్ హీరోగా నటించిన పురుషోత్తముడు సినిమాకి ఇలాంటి పరిస్థితి ఎదురైంది.
జులై 26న విడుదల కాబోతున్న పురుషోత్తముడు మూవీ ప్రీ రిలీజ్ ఈవెంట్ ని అతను లేకుండానే నిర్వహించారు. హీరోయిన్ హాసినితో పాటు బ్రహ్మానందం తదితరులు విచ్చేయగా కేవలం మూవీ గురించి మాట్లాడి నడిపించేశారు తప్పించి ఎలాంటి ప్రశ్నలు ఎదురుకాకుండా జాగ్రత్త పడ్డారు. వాస్తవానికి ఈ వారం వస్తున్న సినిమాల లిస్టు ప్రకారం బజ్ రావాల్సిన వాటిలో పురుషోత్తముడు ముందుండాలి. ప్రకాష్ రాజ్, రమ్యకృష్ణ, బ్రహ్మానందం లాంటి పెద్ద క్యాస్టింగ్ తో పాటు బడ్జెట్ కూడా భారీగానే ఖర్చు పెట్టారు. కానీ దీని స్థానంలో ధనుష్ డబ్బింగ్ మూవీ రాయన్ కే ఎక్కువ బజ్ కనిపిస్తోంది. ఈ వారంలో వచ్చే సినిమాల్లో ఏ సినిమా మంచి విజయం సాధిస్తుందో చూడాలి.
