కమెడియన్ ఆలీ జీవితం మొత్తంలో ఎంతో మధురానుభూతిగా మిగిలే చిత్రం యమలీల. అప్పటికి కమెడియన్ గా మంచి పాపులరాఇటీని సంపాదించుకున్న ఆలీ కి ఈ చిత్ర దర్శక నిర్మాతలు ఎస్వీ కృష్ణారెడ్డి, కె. అచ్చిరెడ్డి, కిషోర్ రాఠీ పిలిచి నిన్ను హీరోగా పెట్టి సినిమా తీయాలనుకుంటున్నాము అని చెప్పగానే ఆలీకి నోట మాట రాలేదట. పైగా సరదాగా కామెడీ చేస్తున్నారనుకున్నాడట ఆలీ. అయితే ఆ తర్వాత అడ్వాన్స్ చేతికిస్తూ నువ్వే హీరో అని కన్‌ఫర్మ్ చేశారు. ఇక ఆలీ మొదటిసారి సోషియోఫాంటసీ సినిమాలో నటించి బ్లాక్ బస్టర్ ని అందుకున్నాడు. మథర్ సెంటిమెంట్ కి సోషియోఫాంటసీ ని యాడ్ చేసి తెరకెక్కించిన ఈ సినిమాకి ప్రేక్షకులు బ్రహ్మరథం పట్టారు.
అంతేకాదు అప్పటి వరకు ఎస్వీ కృష్ణారెడ్డి దర్శకత్వం వహించగా కె. అచ్చిరెడ్డి నిర్మించిన ఏ సినిమా కి ఈ సినిమా రేంజ్ లో వసూళ్ళు రాలేదు. 1994 ఏప్రిల్ 28న విడుదలైన ఈ సినిమాకి ఈరోజు తో విజయవంతంగా 26 సంవత్సరాలు పూర్తి కావడం విశేషం. చిన్న సినిమాగా నిర్మించిన ఈ సినిమా ఎలాంటి అంచనాలు లేకుండా రిలీజైంది. అయితే మొదటి షో నుండే ఈ సినిమా సూపర్ హిట్ టాక్ రావడం తో హీరో ఆలీ అన్న విషయం కూడా ఆలోచించకుండా ఒక పెద్ద స్టార్ సినిమాకి తరలి వచ్చినట్టు వచ్చారు ప్రేక్షకులు. ముఖ్యంగా ఈ సినిమాలో యముడిగా నటించిన కైకాల సత్యనారాయణ, చిత్రగుప్తుడిగా నటించిన బ్రహ్మానందం అద్భుతంగా నటించారు.
సినిమాకి వీళ్ళిద్దరి పాత్రలు ఎంతో కీలకంగా ఉండి సినిమా హిట్ అవడం లో ప్రధానపాత్ర పోషించారు. మనీషా ఫిలిమ్స్ బ్యానర్ లో అచ్చిరెడ్డి నిర్మాతగా కిశోర్ రాఠీ సమర్పణలో రూపొందిన ఈ సినిమాలో సూపర్ స్టార్ కృష్ణ గెస్ట్ అప్పీరియన్స్ గా ఒక స్పెషల్ సాంగ్ చేయడం ప్రత్యేకం. ఇక ఈ సినిమా 200 రోజులు ప్రదర్శింపబడటం విశేషం. ఇదే సినిమాని విక్టరీ వెంకటేశ్ హీరోగా తకదీర్ వాలా పేరుతో హిందీలో రీమేక్ చేశారు. 1995 లో రిలీజైన ఈ సినిమా కూడా మంచి వసూళ్ళను సాధించింది.
