మన ఫైనాషియల్‌ కండీషన్‌ ఎలా ఉందో బ్యాంక్‌ బ్యాలెన్స్‌ చూస్తే సరిపోతుందని చాలా మంది అనుకుంటారు. కానీ అసలు మీ ఆర్ధిక పరిస్థితి ఎలా ఉందో చెప్పాలంటే.. మీ క్రెడిట్ స్కోర్‌ ద్వారా తెలుస్తుంది. లోన్స్‌ తీసుకునేప్పుడు, క్రెడిట్ కార్డులు అప్లై చేసినప్పుడు ఇది చాలా కీ రోల్‌ ప్లే చేస్తుంది. అయితే దీన్ని మనం ఏదో గేమ్‌ ఆడినట్లు ఆడి స్కోర్‌ పెంచుకోలేం. చాలా విషయాల ఆధారంగా ఈ స్కోర్‌ డిసైడ్‌ అవుతుంది. మన చేతుల్లో లేనట్లే ఉంటుంది. కానీ అంతా మన చేతుల్లోనే ఉంటుంది. ఈ క్రెడిట్ స్కోర్‌పై చాలా మందికి అపోహలు ఉన్నాయి.. వాటిని ఈరోజు మనం క్లియర్‌ చేద్దాం..!
తీసుకున్న రుణాన్ని చెల్లించడంలో ఎంత క్రమశిక్షణతో ఉన్నారు? క్రెడిట్ స్కోరు తెలియజేసే ప్రాథమిక విషయం ఇదే. రుణదాతలు ప్రతి రుణగ్రహీతకు సంబంధించిన సమాచారాన్ని క్రెడిట్ బ్యూరోలకు చేరవేస్తుంటారు. వారు ప్రతి విషయాన్నీ రుణ చరిత్రలో నమోదు చేస్తుంటారు. కొత్తగా రుణం కావాలని దరఖాస్తు చేసినప్పుడు బ్యాంకులు, ఆర్థిక సంస్థలు మీ గురించి ఒక్క క్లిక్‌లో తెలుసుకునే వీలుంటుంది. మీకు రుణం ఇవ్వాలా? వద్దా? అనే నిర్ణయం సగం ఇక్కడే పూర్తవుతుంది.
మీరు తరచూ క్రెడిట్ స్కోరును తెలుసుకోవచ్చు. దీనివల్ల మీ స్కోరు, రుణ చరిత్రపై ఎలాంటి ప్రభావం ఉండదు. సిబిల్‌ వంటి ఏదైనా క్రెడిట్ బ్యూరో నుంచి ఏడాదికోసారి ఉచితంగా పూర్తి నివేదికను పొందవచ్చు. ఇప్పుడు చాలా ఆన్‌లైన్‌ ప్లాట్‌ఫాంల నుంచి అపరిమిత ఉచిత నివేదికలనూ తీసుకునే వీలుంది. ఇలా చేయడం వల్ల మీ స్కోరుకు ఎలాంటి హానీ ఉండదు. కానీ, రుణదాత మీ క్రెడిట్ స్కోరును తనిఖీ చేసినప్పుడు స్కోరు స్వల్పంగా తగ్గుతుంది. మీరు రుణం కోసం విచారణ చేసినట్లు నమోదవుతుంది. కాబట్టి, కొత్తగా రుణం తీసుకునేటప్పుడు ముందుగా మీరే సొంతంగా క్రెడిట్ నివేదికను పరిశీలించడం మేలు.
క్రెడిట్ స్కోరుకూ ఆదాయానికీ అసలు సంబంధం లేదు. మీ క్రెడిట్ స్కోరుపై ఇది ఏమాత్రం ప్రభావం చూపదు. చాలా మంది ఎక్కువ జీతం వస్తే.. క్రెడిట్ స్కోర్‌ ఎక్కువ ఉంటుంది అనుకుంటారు. గుర్తు పెట్టుకోవాల్సిన విషయం ఏమిటంటే.. మీరు తీసుకున్న రుణాన్ని ఎలా చెల్లిస్తున్నారు అనేదే ఇక్కడ ప్రధానం. మీకు ఎంత ఆదాయం వస్తుందన్నది పట్టించుకోదు. సకాలంలో చెల్లింపులు ఉంటే.. స్కోరు బాగుంటుంది.
పాన్‌ ఆధారంగా ఒక వ్యక్తి క్రెడిట్ స్కోరును గణిస్తారు. కాబట్టి, వ్యక్తిగతంగా మాత్రమే స్కోరు ఉంటుంది. తల్లిదండ్రులు, జీవిత భాగస్వామి, పిల్లల స్కోరులు మీ క్రెడిట్ స్కోరుపై నేరుగా ప్రభావం చూపవు. వారు తీసుకున్న రుణాలకు చెల్లింపులు బాగున్నా, లేకున్నా మీకు ఎలాంటి సంబంధం ఉండదు. కాకపోతే ఆ రుణాలకు ప్రత్యక్షంగా, పరోక్షంగా మీకు సంబంధం ఉండకూడదు.
కొన్నిసార్లు..రుణం మనది కాకపోయినా..వేరొకరి రుణానికి హామీగా ఉంటాం. సహ దరఖాస్తుగా ఉన్నా మీరూ రుణం తీసుకున్నట్లే. ఆ రుణాన్ని తిరిగి చెల్లించాల్సిన బాధ్యతను మీరు పంచుకున్నట్లే అని గుర్తుపెట్టుకోండి. వాస్తవంగా రుణం తీసుకున్న వ్యక్తి వాయిదాల చెల్లింపులను సరిగ్గా చేయకపోతే.. ఆ బాధ్యత మీపై పడుతుంది. మీరూ బాకీలను చెల్లించడంలో విఫలమైతే క్రెడిట్ స్కోరుపై ప్రతికూల ప్రభావం పడుతుంది. కాబట్టి, హామీ ఇచ్చేటప్పుడు, సహ దరఖాస్తుగా ఉన్నప్పుడు కలిగే ఇబ్బందులనూ దృష్టిలో పెట్టుకొని, నిర్ణయం తీసుకోవాలి.
అప్పు తీసుకోవాల్సిన అవసరం రాకపోవడం మంచి విషయమే. కానీ, జీవితంలో వివిధ లక్ష్యాల సాధనలో రుణాల అవసరం తప్పకపోవచ్చు. ఇల్లు, వాహనం కొనుగోలు, పిల్లల కోసం విద్యా రుణంలాంటివి ఇందులో ఉంటాయి. మంచి క్రెడిట్ స్కోరు 750 మించి ఉంటే.. వడ్డీ రేట్లలో రాయితీలూ పొందే అవకాశం ఉంటుంది. స్కోరు లేకుంటే అధిక రేట్లను చెల్లించాల్సి రావచ్చు. మీకు ఎలాంటి అవసరం లేకున్నా ఒక క్రెడిట్ కార్డును తీసుకుని దాన్ని సరిగ్గా మెయింటేన్‌ చేస్తుంటే.. సకాలంలో బిల్లులు కడుతూ, పరిమితి వరకే వాడుతుంటే స్కోర్‌ పెరుగుతుంది.
చాలామంది రుణం తీసుకోకపోతే ఎలాంటి క్రెడిట్ స్కోరూ ఉండదు. కాబట్టి, రుణ నివేదికను గమనించాల్సిన అవసరం లేదు అనుకుంటారు. గత ఏడాది ఎంతోమంది అనధికార రుణ మోసాల బారిన పడ్డారు. ఎంతోమంది క్రెడిట్ స్కోర్లు దీనివల్ల దెబ్బతిన్నాయి. కాబట్టి, మీకు రుణం లేకపోయినా.. కనీసం ఏడాదికోసారి క్రెడిట్ నివేదికను పరిశీలించడం మంచి అలవాటు.
