కేంద్ర ప్రభుత్వం ప్రకటించిన అగ్నిపథ్‌ పథకంపై నిరసనలు వ్యక్తమవుతున్న విషయం తెలిసిందే. అయితే.. కేంద్రంలో బీజేపీ ప్రభుత్వం తీసుకువచ్చిన అగ్నిపథ్‌ ను వెంటనే రద్దు చేయాలని కాంగ్రెస్‌ పార్టీ ఆధ్వర్యంలో దేశవ్యాప్తంగా సత్యాగ్రహ దీక్షలకు పిలుపునిచ్చారు. ఈ నేపథ్యంలోనే కడ్తాల మండల కేంద్రంలో ఆదివారం పెద్దఎత్తున నిరసన చేపట్టారు. మండల కాంగ్రెస్‌ అధ్యక్షుడు యాట నర్సింహ ఆద్వర్యంలో చేపట్టిన కార్యక్రమంలో కాంగ్రెస్‌, యువజన కాంగ్రెస్‌ కార్యకర్తలు, నాయకులు పెద్ద సంఖ్యలో పాల్గొన్నారు. కాంగ్రెస్‌ జెండాలతో హైదరాబాద్‌-శ్రీశైలం జాతీయ రహదారిపై నిరసన ర్యాలీ నిర్వహించారు. అనంతరం బస్టాండ్‌ కూడలిలో దర్నా, రాస్తారోకో చేశారు.
ప్రధాని మోదీ దిష్టి బొమ్మను దహనం చేసి బీజేపీ, మోదీకి వ్యతిరేకంగా నినాదాలు చేశారు. ఈ కార్యక్రమంలో బ్లాక్‌ కాంగ్రెస్‌ అధ్యక్షుడు నేనావత్‌ బీక్యానాయక్‌, మండల కో-ఆప్షన్‌ సభ్యుడు జహంగీర్‌బాబా, పట్టణ కాంగ్రెస్‌ అధ్యక్షుడు పూల శంకర్‌, వర్కింగ్‌ ప్రెసిడెంట్‌ రాంచందర్‌నాయక్‌, సర్పంచులు సేవ్య బావోజి, రాము నాయక్‌, నాయకులు లక్ష్మణ్‌, ఇమ్రాన్‌బాబా, మల్లేశ్‌గౌడ్‌, హీరాసింగ్‌, మహేశ్‌, రాజేశ్‌, తులసీరామ్‌, బోసు రవి, రాజేందర్‌గౌడ్‌, అంజయ్య పాల్గొన్నారు.
