తెలంగాణ కాంగ్రెస్ పార్టీ నేతలు రాష్టరంలో పార్టీ బలోపేతానికి కృషి చేస్తున్నారు. ఈ నేపథ్యంలోనే పార్టీ అగ్రనేతలతో డిక్లరేషన్లు ప్రకటిస్తు్న్నారు. అయితే.. గతంలో రాహుల్‌ గాంధీ వరంగల్‌లో రైతు డిక్లరేషన్‌ను ప్రకటించిన విషయం తెలిసిందే. అయితే.. ఇవాళ హైదరాబాద్‌లోని సరూర్‌నగర్‌లో కాంగ్రెస్ యువ సంఘర్షణ పేరుతో భారీ బహిరంగ సభను నిర్వహించారు. ఈ సభకు కాంగ్రెస్ అగ్రనాయకురాలు ప్రియాంక గాంధీ హాజరయ్యారు. అయితే.. తెలంగాణ కాంగ్రెస్ సీనియర్ నేత, భువనగిరి ఎంపీ కోమటిరెడ్డి వెంకట్ రెడ్డి తీరు మరోసారి హాట్ టాపిక్‌గా మారింది.
టీ కాంగ్రెస్ ప్రతిష్టాత్మకంగా తలపెట్టిన యువ సంఘర్షణ సభకు ప్రియాంక గాంధీ హజరుకాగా.. యువతే టార్గెట్‌గా కాంగ్రెస్ చేపట్టిన ఈ సభకు స్వయంగా ప్రియాంక గాంధీ హాజరుకావడంతో దాదాపు రాష్ట్రంలోని టీ- కాంగ్రెస్ నేతలు అంతా ఈ సభకు హాజరయ్యారు. అలాంటి ఈ సభకు ఎంపీ కోమటిరెడ్డి వెంకట్ రెడ్డి గైర్హాజర్ అయ్యారు. అయితే, విదేశీ టూర్‌లో ఉండటంతోనే కోమటిరెడ్డి ఈ సభకు హాజరుకాలేదని సమాచారం. ప్రియాంక గాంధీ ఆఫీస్‌కు ఈ సమాచారం పంపించామని కోమటిరెడ్డి సిబ్బంది అంటున్నారు. అయినప్పటికీ కోమటిరెడ్డి తీరుపై మరోసారి భిన్నాభిప్రాయాలు వినిపిస్తున్నాయి. తెలంగాణ కాంగ్రెస్ ప్రతిష్టాత్మకంగా తలపెట్టిన ఈ సమావేశానికి ప్రియాంక గాంధీ హాజరవుతారని షెడ్యూల్ ముందే ఫిక్స్ అయినప్పటికీ కోమటిరెడ్డి మాత్రం విదేశీ టూర్‌కు వెళ్లడంపై కొందరు పెదవి విరుస్తున్నారు.
