మునుగోడు ప్రచారంలో ప్రత్యర్థులపై విమర్శలు తారాస్థాయికి చేరుకుంటున్నాయి. అయితే మునుగోడు ఉప ఎన్నికలో పోస్టర్లు కలకలం సృష్టిస్తున్నాయి. ఇప్పటికే కాంట్రాక్ట్‌ పే లాంటి వంటి పోస్టర్లు వెలుగోలకి రాగా ఈ సారి ఏకంగా పోస్టర్లపై పేర్లతో సహా గోడలపై అతికించారు. ఖబడ్దార్‌ బీజేపీ.. మునుగోడులో మీకు గోరీ కడతామని లంబాడి హక్కుల పోరాట సమితి హెచ్చరించింది. లంబాడీలను ఎస్టీ జాబితా నుంచి తొలగించాలని ఢిల్లీలో బీజేపీ కుట్రలు చేస్తున్నదని ఆరోపిస్తూ ఆ పార్టీకి వ్యతిరేకంగా చండూరు (Chandur) మున్సిపాలిటీలో పోస్టర్లు వెలిసాయి. మునుగోడులో రాజగోపాల్‌ రెడ్డి ద్వారా లంబాడీల ఓట్లను కొనాలని ఆ పార్టీ నాయకులు దుష్ట రాజకీయాలు చేస్తున్నారని పోరాట సమితి విమర్శించింది. తాము అమ్ముడుపోయే వాళ్లం కాదని, బానిసలం అంతకన్నా కాదని.. లంబాడి బిడ్డలమని హెచ్చరించారు.
లంబాడి హక్కుల పోరాట సమితి పేరుతో వెలసిన ఈ పోస్టర్లు మున్సిపాలిటీలో ప్రస్తుతం హాట్‌ టాపిక్‌గా మారాయి. కాగా, మునుగోడు నియోజకవర్గంలో బీజేపీకి వ్యతిరేకంగా రోజుకోవిధంగా పోస్టర్లు వెలుస్తున్నాయి. తాము గెలిస్తే రూ.3000 పెన్షన్‌ ఇస్తామన్న రాజగోపాల్‌ రెడ్డి సవాల్‌ విసురుతూ.. ఏ రాష్ట్రంలో ఎక్కువ పింఛన్‌ ఇస్తున్నారని పేర్కొంటూ గురువారం చండూరులో వాల్‌పోస్టర్లు అంటించారు. అదేవిధంగా నేడే చూడండి.. షా సమర్పించు.. 18000 కోట్లు అంటూ రాజగోపాల్‌ రెడ్డి బీజేపీకి అమ్ముడు పోయాడని తెలిపేలా పోస్టర్లు వెలుస్తున్నాయి.
