తెలంగాణ గవర్నర్ తమిళసైకు మళ్లీ అవమానం ఎదురైంది. మరోసారి గవర్నర్ టూర్‌లో ప్రోటోకాల్ వివాదం తెరపైకి వచ్చింది. గురువారం కాకతీయ విశ్వవిద్యాలయం స్నాతకోత్సవానికి వరంగల్ జిల్లాకు గవర్నర్ వెళ్లారు. ఈ సందర్భంగా గవర్నర్ పర్యటనకు కలెక్టర్, కమిషనర్ దూరంగా ఉన్నారు. దీంతో ఈ వార్త చర్చనీయాంశంగా మారింది. కాగా, కేయూ గెస్ట్ హౌస్ దగ్గర ఆర్డీఓ, వీసీ గవర్నర్‌కు స్వాగతం పలికారు.
ఇటీవల గవర్నర్ పర్యటనల్లో తరచూ ప్రోటోకాల్ వివాదం తెరపైకి వస్తోంది. నిబంధనల ప్రకారం.. గవర్నర్ వస్తే కలెక్టర్లు, ఎస్పీలు స్వాగతం పలకాలి. కానీ ఈ మేరకు ప్రోటోకాల్ పాటించలేదనే విమర్శలు వస్తున్నాయి. అయితే ప్రభుత్వ వ్యవహారాల్లో గవర్నర్ అతిగా జోక్యం చేసుకుంటున్నారని టీఆర్ఎస్ ఆరోపిస్తోంది. అయితే తన పరిమితుల మేరకే తాను నడుచుకుంటున్నట్లు గవర్నర్ చెబుతున్నారు.
