తమిళనాడు ముఖ్యమంత్రి స్టాలిన్ తెలంగాణ రాష్ట్ర సీఎం కేసీఆర్కు ఆహ్వానం పంపారు. ఈ నెల 28 నుంచి చెన్నైలో జరగనున్న 44వ ఫిడే అంతర్జాతీయ చెస్ ఒలంపియాడ్ పోటీలకు రావాల్సిందిగా కోరారు. ఈ మేరకు డీఎంకే రాజ్యసభ సభ్యుడు గిరిజానన్ కేసీఆర్కు ఆహ్వాన పత్రిక అందించారు.
ముఖ్యమంత్రి కేసీఆర్ చెన్నైకి రావాలని తమిళనాడు సీఎం స్టాలిన్ ఆహ్వానం పంపారు. తమిళనాడు రాష్ట్రంలోని చెన్నైలో జరగనున్న 44వ ఫిడే అంతర్జాతీయ చెస్ ఒలంపియాడ్ పోటీలకు కేసీఆర్ను ఆ రాష్ట్ర సీఎం ఎం.కె.స్టాలిన్ ఆహ్వానించారు. ఈ మేరకు డీఎంకే రాజ్యసభ సభ్యుడు గిరిజానన్ ద్వారా ఆహ్వాన లేఖను పంపారు. హైదరాబాద్ ప్రగతిభవన్లో కేసీఆర్ను కలిసిన గిరిజానన్.. ఆహ్వాన పత్రిక అందించారు. ఇది తన వ్యక్తిగత ఆహ్వానంగా భావించి జులై 28న ప్రారంభోత్సవ కార్యక్రమానికి రావాలని విజ్ఞప్తి చేశారు.
ఎంపీ గిరిజానన్.. ప్రగతి భవన్లో కేసీఆర్ను కలిసి శాలువా కప్పి జ్ఞాపికను అందించారు. అనంతరం ఫిడే అంతర్జాతీయ చెస్ ఒలంపియాడ్ పోటీలకు ఆహ్వానించారు. ఈ పోటీల్లో 188 దేశాల నుంచి చెస్ క్రీడాకారులు పాల్గొంటున్నారు. భారత దేశంలో మొదటిసారిగా.. ఆసియాలో మూడోసారి జరుగుతున్న ఈ పోటీలు చాలా ప్రతిష్ఠాత్మకమైనవని ఆహ్వానలేఖలో స్టాలిన్ ప్రస్తావించారు.
