తెలంగాణలోని టీచర్ల బదిలీలపై రాష్ట్ర విద్యాశాఖ కీలక నిర్ణయం తీసుకుంది. తెలంగాణలో రెండు మల్టీజోన్లలో పదోన్నతులు పక్కనపెట్టి.. కేవలం బదిలీలు మాత్రమే పూర్తి చేయాలని రాష్ట్ర విద్యాశాఖ నిర్ణయించింది. ఈ మేరకు మంగళవారం బదిలీలకు సంబంధించిన షెడ్యూల్‌ను సైతం రిలీజ్‌ చేసింది. రంగారెడ్డి జిల్లాల్లో సీనియార్టీపై, పదోన్నతులకు టెట్‌ అర్హత కేసులు, పదోన్నతులపై స్టేలు ఉన్న నేపథ్యంలో విద్యాశాఖ ఈ నిర్ణయం తీసుకున్నది.
మల్టీజోన్‌ 1, 2 పరిధిలోని ప్రభుత్వ, జిల్లా పరిషత్‌ సెకండరీ గ్రేడ్‌ టీచర్స్‌ (SGT), మల్టీజోన్‌ -2 పరిధిలోని జిల్లా పరిషత్‌ పాఠశాలల్లోని స్కూల్‌ అసిస్టెంట్లు, సెకండరీ గ్రేడ్‌ టీచర్స్‌ (SGT) టీచర్ల బదిలీల షెడ్యూల్‌ను విడుదల చేసింది. మంగళ, బుధవారాల్లో అప్పీళ్లు, ర్యాంకుల దిద్దుబాటు, ఖాళీల సవరణల అప్‌డేట్‌కు అధికారులు అవకాశం కల్పించగా.. ఈ నెల 5న తుది సీనియారిటీ జాబితా ప్రకటించనున్నారు. ఈ నెల 6, 7 తేదీల్లో బదిలీలకు సంబంధించిన వెబ్‌ ఆప్షన్‌కు అవకాశం ఇచ్చారు. 8న వెబ్‌ ఆప్షన్ల సైతం ఎడిట్‌ చేసుకునే వీలు కల్పించింది. వెబ్‌ ఆప్షన్లు ఎంచుకున్న తర్వాత ఖాళీల పాయింట్లు, స్పౌజ్‌ పాయింట్లు ఎలాంటి మార్పులుండవని అధికారులు స్పష్టం చేశారు.
