తెలంగాణ రాష్ట్రంలో 2,620 మద్యం షాపుల లైసెన్సుల జారీకి ప్రభుత్వం నోటిఫికేషన్ ఇచ్చింది. పాత విధానం ద్వారానే లైసెన్సులు ఇవ్వనుండగా.. దరఖాస్తు, లైసెన్సుల ఫీజులో ప్రభుత్వం ఎలాంటి మార్పు చేయలేదు. ఈ నెల 3న జిల్లాల వారీగా ఎక్సైజ్ శాఖ నోటిఫికేషన్ ఇవ్వనుండగా.. ఈ నెల 4 నుంచి 18వ తేదీ వరకు దరఖాస్తులు స్వీకరిస్తారు. ఈ నెల 21న డ్రా ద్వారా మద్యం షాపుల లైసెన్సులు ఎంపిక చేస్తారు. దరఖాస్తు ఫీజు రూ.2లక్షలుగా నిర్ణయించారు.
అయితే.. ఈనెల 4వ తేదీ నుంచి దరఖాస్తుల స్వీకరణ ప్రక్రియ మొదలై 18వ తేదీ వరకు కొనసాగుతుందని అబ్కారీ శాఖ తెలిపింది. ఈనెల 21వ తేదీన జిల్లా కలెక్టర్ల పర్యవేక్షణలో డ్రా ద్వారా లైసెన్స్ల ఎంపిక కొనసాగుతుందని ప్రభుత్వం స్పష్టం చేసింది. ప్రస్తుతం ఉన్న మద్యం లైసెన్స్ల గడువు ఈ ఏడాది నవంబరు 30వ తేదీ వరకు ఉంది. ఈ నెలలో మద్యం లైసెన్స్ల ఎంపిక ప్రక్రియ పూర్తి అయినప్పటికీ.. వీరి లైసెన్స్లు ఈ ఏడాది డిసెంబరు ఒకటో తేదీ నుంచి చెల్లుబాటు అవుతాయని అబ్కారీ శాఖ స్పష్టం చేసింది. డిసెంబరు ఒకటో తేదీ నుంచి లైసెన్స్లు తమకు నిర్దేశించిన ప్రాంతాల్లో మద్యం దుకాణాలు ఏర్పాటుకు అవకాశం ఉంటుందని వివరించింది.
